Гүлжигит Сатыбеков 9-январь күнү 34 жашын Бишкек шаарындагы кафелердин биринде сахналаш, санаалаш досторунун арасында тосту. Демейде туулган күн болгондо коноктор курсакты кампайтып, бийлеп эле кайта берет эмеспи. Мында туулган күн ээси да, коноктор да сахна адамдары болгондуктан, бир мүнөт зеригишкен жок. Алар кыз-жигит болуп эки жаатка бөлүнүп, аккордеон менен сармерден айтышып кечени ого бетер жандандырышты.
Гүлжигит мырзаны куттуктап сахналаштары Мирлан Баеков, «Кеңеш» тобу, Фарида Карбосова, Ильяз Абдыразаков, Анжелика, Гүлбү Орозкул кызы жана башкалар келишти. Туулган күн ээси «Мага берилген ар бир белек баалуу. Бирок эң өзгөчөсү – досторум берген аркардын мүйүзүнүн үстүнө жасалган илбирс болду. «Илбирс эч качан жеңилген эмес, ар дайым жеңишке жетет. Сен дагы илбирстей болуп тоскоолдуктарды жеңе бергин» деген каалоо-тилектерин билдиришти»,- дейт.

star@super.kg