Куудул Абдылда Иманкулов былтыркы 50 жылдык мааракесине карата уюштурган жеке концертинде «эл мени салкын кабыл алса сахнадан кетем» деп жүргөн. Элдин купулуна толгон концерттен кийин быйыл да Кыргызстанды түрө кыдырып гастролго чыгууну пландап жатканын айтат.

– Жеке концертиңизди бергени жатыптырсыз, даярдыктар кандай болуп жатат?
– Рахмат. Айрымдар «былтыр эле 50гө чыкпадың беле, быйыл дагы элүүгө чыгып жатасыңбы?» дегенсип, быйыл дагы концерт берип жатканымдын себебин сурап жатышат. Юбилейлик концертимди бергенде келгендин баары эле ыраазы болуп кеткен жок. Себеби мени куттуктап келип сөз сүйлөп, ыр ырдагандарга убакыт көп кетип калган. Ошондуктан мен элге былтыркыдан карызмын. Даярдыктар болсо өз нугунда жүрүп жатат.

– Жаз айында төрөлүпсүз. Туулган күнүңүздү кайсы чөйрөдө, кимдер менен белгилейсиз?
– Бул датага анча маани берип, конок чакырбайбыз деле. Бирок өздүк майрамым 20-март болгондуктан, Нооруз майрамы менен удаалаш болуп, үйдө эрте эле дасторкон жайылат. 3-4 жакын досум чакырсам-чакырбасам да үйгө келип куттукташат.

star@super.kg