Айбек Карымов менен Гүланданын дуэтин 4 жашка жакындап калган кызы Раянанын аткаруусунда дал өзүндөй уктум. Апасы Гүланда да кызынын кабыл алуу жөндөмү күчтүү экенин айтты. Тыпылдаган кара кыз кызыктуу, таттуу сүйлөп, маңдайыбызда ойноп отурду.

– Атың ким?
– Раяна.

– Кимге окшошсуң?
– Апама да, атама да окшошмун.

– Сени ким төрөдү?
– Мени атам төрөдү, атам кусканда оозунан секирип кеткем.

– Атаң сени эмне деп эркелетет?
– Мени атам «жаным» деп эркелетет. Мен атамды «жаным атам» дейм. Атам такыр арак ичпейт, сок ичет. Менин шампунум бар.

– Шампунь менен башыңды жууганда ыйлайсыңбы?
– Ыйлайм, анан апам мени урат.

– Кечинде атаң келгенде «апам урду» деп айтасыңбы?
– Айтам, анан мону (апасын көрсөтүп) өлтүрөт.

– Кантип өлтүрөт?
– Бычак менен кулагын кесет.
Гүланда: – Кой, кызым, жакшынакай айтып бер. Мен кээде чаап коём да, анан атасына арызданып, «апамдын кулагын кес» дей берет, ошону айтып жатат.

– Атаң менен апаң урушабы?
– Апам атамдын бетинен өбөт, атамды жакшы көрөт. Атам апамды көтөрөт.

– Сага кийимди ким сатып берет?
– Мага атам тапошка (тапочка), футболка сатып берет. Апам магазинден колготки сатып берген. Асеманын (туугандары) косметикасын монтип-монтип боёп алам.

– Апаңа жардам бересиңби?
– Үйдөн коноктор кеткенде апама жардам берем. Мага атам үй жасап берет.

– Бала-бакчага барасыңбы?
– Барам, балдар менен урушпайм. Орус бала-бакчага барганда ботко жейм, ошолор менен урушам.

– Орусча билесиңби?
– Билем, как я.

– Кичинекей иниң бар беле?
– Аты Моке. Жаман көрөм. Оюнчуктарымды алат. Ал ыйлаак, таенемдикине таштап койгом. Аны чаап койсом ыйлайт.

– Чоңойгондо ким болосуң?
– Министр же врач болом.

– Атаң менен апаң ким болуп иштешет?
– Экөө токоч жасап иштешет.

– Эмне кылып ойногонду жакшы көрөсүң?
– Алина (кошуна дос кызы) менен ойногонду жакшы көрөм. Апам, атам, мен камыр жасайбыз.

Сүйүн Кулматова
star@super.kg