«Алай» жана «Дордойдун» Кыргызстандын Суперкубогу үчүн болгон беттеши менен футбол боюнча өлкөнүн 23-чемпиондугунун быйылкы сезону башталды. Өлкө биринчилигине быйыл 8 команда ат салышмакчы.
24-март. Суперкубок
«Алай» (Ош) – «Дордой» (Бишкек) – 0:3
Голдор: Милованович (20, 87-мүнөттөр), Байматов (79-мүнөт)

Топ-лига. 1-тур. 21-март
«Алга» (Бишкек) – «Ала-Тоо» (Нарын) – 1:0
«Абдыш-Ата» (Кант) – «Манас» (Бишкек) – 6:1
«Нефтичи» (Кочкор-Ата) – «Алдиер» (Куршаб) – 0:3

«БАВАРИЯ» – ЧЕМПИОН!
25-мартта Германиянын чемпиондугунда (Бундеслига) 27-тур оюндары орун алып, мюнхендик «Бавария» мелдештин жыйынтыкталарына 7 тур калганда чемпиондукту камсыздай алды. Бул күнү «Бавария» атаандашы «Гертаны» 3:1 эсебинде утуп, 24-ирет өлкө чемпиону аталды.
Белгилүү Гвардиола машыктырган «Бавария» клубу сезон алкагында 25 оюнда жеңүүчү болуп, 2 оюнда тең чыккан. Клуб быйылкы сезондун эсебинен өлкө чемпиондугунда жеңилүүгө туш боло элек. Бул көрсөткүч менен «Бавария» мелдеш жадыбалында эң күчтүү атаандашы, дортмунддук «Боруссияны» 25 упай артка таштап келе жатат.

КЫРГЫЗ МУШКЕРЛЕРИ 4 АЛТЫН УТУШТУ
27-мартта Казакстандын Алматы шаарында жыйынтыкталган эл аралык мелдеште кыргызстандык мушкерлер 4 алтын медаль багындырышты.
Мушкер Мирлан Түркбай уулу (49 кг), Эрмек Сакенов (64 кг), Эркин Болотбек уулу (69 кг) жана Чыңгыз Борбашев (91 кг) салмактык бөлүктө 1-орунду ээлешти. Ал эми Турат Осмонов менен Азамат Каныбек уулу (75 кг) күмүш тагынса, Адилет Аблашимов (69 кг) менен Өмүрбек Малабеков (56 кг) өз салмактарында коло медалдарды утуп алышты.

Адилет Керимбек уулу
sport@super.kg