Ашкөк, кинза, петрушка, сельдерейди өстүрүү ыкмалары окшош:

• Күздө жерге кык чачып, тоңдуруп айдап койсо, түшүм жакшы болот. Эгер күздө жер айдоого жетишпей калсаңыз, анда жазында күн жылып, жер тапка келгенде деле айдоого мүмкүн. Айдалгандан кийин малаланып, урук себилет.

1 ГЕКТАР ЖЕРГЕ КАНЧА УРУК СЕБИЛЕТ?
Ашкөк – 36 килограмм (1 килограммы 160 сомдон);
Петрушка – 6 килограмм (1 килограммы 500 сомдон);
Сельдерей – 2 килограмм (1 килограммы 500 сомдон);
Кинза – 40 килограмм (1 килограммы 170 сомдон)
Ашкөк менен кинзанын уругу чоң болгондуктан көбүрөөк кетет.

• Себилген жерге жөөктөр салынат.
• Кийин сугаруу кезеги келет. Жерде нымдуулук жетишерлик болсо, анда кечирээк сугарылат. Эгер жерде ным аз болуп, жаан жаабаса, анда сепкенден 3-4 күндөн кийин сугарууну баштоо керек. Болбосо жер кургап кетип, урук жакшы өнбөй калат. Негизи көк чөптөр жерди кургатпай сугарып турууну талап кылат. Алардын өңү ысыкта кара-көк тарта түшсө эле суусаганынын белгиси.
• Отоо чөптөрдү өлтүрө турган атайын дарыны сууга кошуп чачуу зарыл. 1 гектар жерге 5 литр дары кетет. Анын 1 литри 350-400 сомдун тегерегинде.
• Жер семирткич (селитра) себилет. Муну көк чөптөрдүн бою 10 сантиметрдей болгондо себүү туура. 1 гектар жерге 280 килограмм селитра кетет. Анын 50 килограммдык мүшөгү 1200 сом.
• Отолуп, суюлтулат.
• Жер семирткич берилет (селитра чачкандан 1 аптадан кийин). 1 гектар жерге 3-4 килограмм жер семирткич сууга кошулуп чачылат. Анын 1 килограммы 180-200 сомдун айланасында.
• Арадан 10 күн өткөрүп, кайра жер семирткич чачылат. Мурунку чачкандай жер семирткичти же анын башка түрүн чачса деле болот. 1 гектарга деле 3-4 килограмм жер семирткич кетет, баалары жогоркудай эле.
• Бул аралыкта көк чөптөр өсүп жетиле баштайт.

Кайсы чөп канча күндө өсүп жетилип, кыркууга даяр болот?
Ашкөк – 40 күндө, кинза – 45 күндө, петрушка менен сельдерей – 70 күндө.

ОРУП-ЖЫЙНОО, САТУУ, КИРЕШЕ
– Биз көк чөптөрдү чоң аш бычактар менен кесип, баштыктарга салып жыйнайбыз. Анан сууга жууп, тазалап, боолоп байлай баштайбыз. Боологонго көп кол керек болгондуктан жумушчуларды жалдайбыз. Аларга 1 боосу үчүн 40-50 тыйындан төлөйбүз. Айрымдары бир күндө 3 миңге чейин боо байлап, акчаны жакшы табат.
Боолонуп даяр болгондорун базарга алып барып, дүңүнөн өткөрөбүз. Айрым ишкерлер бизден алып, Ош, Жалал-Абадга, Алматы, Таразга өткөзгөнгө алып кетишет. Алар товар сапатын жоготпоосу үчүн Бишкектен кечки убак салкында чыгышып, таңга маал базарларда болуп калышат.
Базарларга өткөзүүдөгү баасы суроо-талапка жараша. Көк чөптөр аз болсо кымбатыраак, көп болсо арзаныраак өткөрөбүз. Бир боосу 1,5 сомдон 3 сомго чейин бааланат. Кээде 4-5 сомго чыгып кетет.
Кеткен чыгымдардын баарын чыгарып салсак, ашкөк менен кинзадан таза киреше 1 гектарынан 30-40 миң сомго чейин түшөт. Ал эми сельдерей менен петрушканы 5-6 жолу оруп алгандыктан, андан пайда булардан 5-6 эсе көп түшөт. Айталы, 150 миңден 240 миң сомго чейин болушу мүмкүн.

Канымжан Усупбекова
kenesh@super.kg