Жазгы талаа иштери Кыргызстандын бардык аймактарында кызуу жүрүп жаткан чагы. «Өнүгүү-Прогресс» саясий партиясы Нарын облусунун дыйкандарынын сугат суу көйгөйүн чечип берүү максатында, тоолуу Ак-Талаа жана Тянь-Шань райондоруна экскаватор жеткирилип берилди.
Алыскы райондордо толуп, керектен чыгып калган суу каналдарын, арыктарды калыбына келтирип, жаңыларын да ишке киргизүү иштери башталууда. Жалпы эсеп менен узундугу 34 чакырымды түзгөн арык жана каналдар тазаланып, кээ бир жерлерде жаңы каналдар казылмакчы. Суу дың жерлерди иштетүүгө багытталат. Жер иштетүүнү өнүктүрүү – «Өнүгүү-Прогресс» саясий партиясынын негизги максаттарынын бири.
«Учурда эл жер иштетүүгө өтө баштады. Жер иштетип эмгектенүүгө реалдуу мүмкүнчүлүк пайда болду. Себеби «Өнүгүү-Прогресс» партиясынын арты менен бизде МТС ачылып, жаңы айыл-чарба техникасы келген. Эл пайдасын көрүп, турмушун оңдоп аларына көзү жетип калды. Мен уккандай, жергебизде өндүрүштүн толук циклин түзүү планы бар экен, ал ун өндүрүүчү комбинат», - дейт Нарын облусунун ишмерлеринин бири Азат Айнабаев.
Жергиликтүү тургундардын айтымында, жалпысынан 1200 гектардан кем эмес, мурун иштетилбеген дың жерди өздөштүрүү максаты коюлган. Мындай кадамдар жергиликтүү дыйкандардын өздөрү өндүргөн айыл чарба продукциясы менен камсыз болушуна зор салымын кошот.

Айзатбек Асанкул уулу