Концерттин аталышы – «Керемет дүйнө»
Концерт өткөн күндөр – 23-24-25-апрель (23-апрелдеги концерттен)
Өткөн орду – Улуттук филармония
Башталышы – 18:40 (10 мүнөт кечикти)
Көрүүчүлөр – Залдын 100 пайызы
Алып баруучулар – Эркин Рыскулбеков, Омар
Мыкты номер – Гүлнур Сатылганова менен Бек Борбиевдин «Ак көгүчкөн» дуэти
Билет баасы – 700 сом, алып сатарлар 1000 сомго чейин чыгарышты

«Мыкты концерт берем» деп чуркап жүргөн ырчы 100 пайыз максатына жетти десек жарашат. Көшөгө ачылып, сахнага ааламдын элесин берген ак жарыктар пайда болду да, кыздар бийлеп киришти. Ортого коюлган тепкич эки жакка ажырап, артындагы Жер шарынан Гүлнур Сатылганова жаркырап чыга келди. Сахнанын жасалгасында кеп жок, эми, чоң экран, кызыл-тазыл жарыктар, кыскасы, бул көрүнүштүн артында көп убакыт, бир топ акча, изденүү менен жуурулушкан эмгек жатканы дароо билинди.
Алгач эле «Асман» чыгармасын жаңырткан ырчы күйөрмандары менен амандашып алып, кыргыз жыттанган ырларын биринин артынан бирин сунуп баштады. Алып баруучулук тизгин Эркин Рыскулбеков менен Омарга тийиптир. Ырчы болуп жүрүп эле алып баруучулукка өтүп кетүү оңой эмес да, Омар башында сүрдөдү, бирок тез эле ордун, ишин жөнгө салып кетти. Аңгыча Гүлнур айым оюм-чийим түшүрүлгөн формасы менен чыгып, «Камбаркан» ансамблинин коштоосунда туулган жери, эли туурасындагы ырларын аткара баштады. Пультта үн башкарып отурган жигит микрофондун үнүн азайтып койду окшойт, ырчынын үнү адаттагыдай шаңдуу чыккан жок. Көрөрмандын көбү жумуштан чыгып баргандар экени көрүнүп турду. Чарчагандарга андай ыргак керек эмес эле деп ичимден ойлоп койдум.
Концертте отургандардын 80 пайызы орто, улуу муун экен. Ал эми эстрада менен коштолгон 2-бөлүк залды шаңга бөлөдү. Ар бир ырды бирде чимирилип, так секирип, бирде сальто жасаган «Виктория», «Жаш кыял», «Ак марал», «Ханыша», «We’ll be» бий топтору коштоду. Концертте Бек Борбиев жана «Style Mix» тобунун бирден ыр аткарганын кошпогондо, жалаң Сатылганованын аткаруусундагы чыгармалар жаңырды. Гүлнур «Ак көгүчкөндү» ырдын автору Бек Борбиев менен аткарганы элге абдан жакты. Ыр соңундагы узакка созулган кол чабуулар аны далилдейт. «Эстрада менен ырдайын десем эжем болбой койду» деген Бек мырза аккордеонун асынып «Эркинайды» аткарды. Берадор мырзанын репертуары өтө бай, бирок эмнегедир алардын ичинен «Эркинайды» тандап, анын саптарын өзгөртүп «сүйүп калып сени, Эркинай, ошон үчүн кеттим, ай» дегени шек жаратты. Ырдын баштапкы текстинде «кеттим» деген сөз жок эле го деп ойлондум. Эми автор кандай өзгөртүп ырдайт, өзү билет дечи, бирок турмушунда чын эле башкага кеттиби же бул жөн гана тамашасыбы деген эки анжы ойго кептелдим.
Гүлнурдун обону кытайлык ырчы Кубандык Жаасынга, сөзү Кыялбек Урманбетовго таандык «Талантка таазим» деген жаңы ырына да күбө болдук. Көзү өтүп кеткен дүйнөлүк таланттарга арналыптыр. Ырда Майкл Жексондун аты айтылып, ортосунда ага окшошуп кийинген бийчи Майклдын дал өзүндөй бийледи. 4 саатка созулган ыр кечеде Гүлнур шоу-бизнестин көрүнүктүү, сүймөнчүктүү мырзалары менен жакшы дуэттерди тартуулады. Аягында «Каалайм сага» деген ырын бирден роза гүлүн концерт ээсине сунуу менен аткарышты. «Роза гүлү сүйүүнү билгизет» дейт эмеспи. Ырчы катары, эже катары сүйүүсүн билдирген Омар, Мирбек Атабеков, Аяр, Эркин Рыскулбеков, Арсен, «Style Mix» тобунун жигиттери Адилет, Талас ошентип концертти жыйынтыкташты. Гүлнурдун концерттери дайым жакшы даярдык менен өтөт. Бул жолу да «5» деген баага татыды.

Толик сынчы