Асан, Үсөн Бердибаев деген ага-инилер кыргыз мода дүйнөсүндө 2-3 жылдан бери аралашып келатышат.  Асан андрогин модель катары таанылса, Үсөнү дизайнер, сулуулар сынагын уюштуруучу катары активдүү эмгектенишүүдө. Активдүү дегенибиз, алар жылына кеминде 2-3 жолу сулуулар сынагын уюштурушат.
Март айында өздөрүн «Idol Fashion Management» моделдик агенттиги атаган ага-инилер «Kyrgyzstan's next top model»  («Кыргызстандын кезектеги топ модели») аттуу сынак жарыялашкан. «Атың чыкпаса жер өрттө» болуп булардын сынагынан да өздөрүнүн аты укмуш чыкты. Көрсө, моделдерди ага-инилер реалити-шоу кылып тандайбыз дешкен экен. Реалити-шоусунун азабын эми сынактын катышуучулары тартып отурушат.
Маалыматтарга караганда, Ысык-Көлдө өтмөкчү болгон шоу болбой эле, катышуучулар жөн гана жүрүшкөн. Жыйынтыгында уюштуруучулар моделдеринин баскан-турганына төлөй албай, аларды «уктатып» кетишиптир. Болгондо да 3 катышуучунун паспортун күрөөгө коюп, «коёндун сүрөтүн тартышыптыр». Бердибаевдерден кайсы бир чоң медиакомпания да жапа тартканын, аларга ага-инилер болжол менен 1300 доллар карыз экенин айтып маалымат булактарынын бирине даттанышкан. Бул окуя боюнча уюштуруучуларга чалып да, кат жазып да суроолорубузга жооп ала алган жокпуз.
Баса, былтыр Үсөн Бердибаев менен «Супер сулуу» сынагында биз да иштешип, кызык окуяга тушукканбыз. Катышуучу кыздардын бут кийимдерин, акчасын бербей, Үсөндү күнү-түнү аңдып калган күндөрүбүз болгон. Акыры укук коргоо кызматкерлерине кайрылып, араң алган элек. «Укмуштуунун төөсү жорго» деген ушул тура.

star@super.kg