Кичүү кызы Алиманын тушоосун кесип, жаңы эле конокторун узаткан Назми бизди жакшы маанайда тосуп алды. Жарык, өзгөчө дизайн менен жасалгаланган 2 бөлмөлүү үйүн бизге тааныштырып чыкты. Ырчынын гүлдөрүн, аквариумдагы балыктарын, ар бир буюм жарашыктуу коюлганын көрүп, табити мыкты, эмгекчил кожойке экенин баамдадык.
-Чынын айтсак биз бул үйгө кир жуугуч машина, телевизор, компьютер, идиш-аяк анан кийимдерибиз менен эле келгенбиз. Мурунку кожойке турмушка чыга элек, жаш кыз экен. Оңдоп-түзөө иштерин бүтүрүп, ылайыктап мебель алганда эле күйөөгө чыгып жатканына байланыштуу «сатам» деп жарнама берген. Келип көрүп үйдү аябай жактырдым. Дизайнер менен тыгыз иштешиптир, анын талантына баа бердим. Бөлмөлөр адатта төрт бурч го, биздики беш бурч да болуп кетет. Ар бир бөлмөдө балкон бар, ал өзүнчө чакан бөлмө болуп калат. Ашкананын балконунда муздаткыч, кир жуугуч машина, диспенсер, көп колдонулбаган идиш-аяктар жана тамак-аш турат.
– Бул гүлдөр ашкананын балконундагы терезеде гана жакшы өсүшөт. Турмушка чыкканда апам белек кылган. Башка бөлмөлөрдөн куурай баштаганда орун которуштуруп койсом, тынбай гүлдөп жатышат. Кыпкызыл болуп ачып турган гүлдүн аты – Герань, дарылык касиети да күчтүү. Балдарымдын кулагы ооруса жалбырагын ушалап, суусун чыгарып туруп, кулактарына салып, топусун кийгизип койсом тез эле басылат. Анын жанындагы гүлдүн атын билбейм, өзүм эле Бабочка деп коюп алдым.
– Балыктын сүзгөнү адамдын нервин эс алдырат экен. Залда турган аквариумда 5 балык бар. Жаңы жылда жолдошум балдар үчүн деп атайын сатып келген.
– Стенкада менин акыркы беш жылда алган ордендерим, дипломдорум турат. Калган сыйлыктарым апамдын үйүндө.
Зал менен балкондун ортосун жылдырма эшик бөлүп турат. Залдын балконунда менин сахнага кийчү кийимдерим, себим жана компьютер бар. Себимдин да көбү апамдыкында, үйгө алдырганым менен көп деле колдонулбайт экен.
– Балам Феликс 8-класста окуйт. Жолдошумдун биринчи никесинен. Феликс колума 3-классында келди. Ага чейин апасы менен Казакстандын Караганда шаарында жашачу. Атасын сагынып келе берген. Эжеси, улуу кызым Алина да бойго жетти, жакында кайнене болом дегендей, үйүбүздү дагы чоңойтушубуз керек.
– Бул болсо уктоочу бөлмөбүз. Эки кызым биздин жаныбызда, манежде укташат. Башка бөлмөгө бөлгөндөн атасы экөөбүз тең «ачынып калышса ооруп калат» деп корко беребиз. Альбина бала бакчага барат, 4 жашта. Кичинесинен таенеси баккан, апам 2 жашында тамганын баарын үйрөткөн, азыр тамгаларды кошуп окуйт. Кичүүсү Алиманы өзүм карайм.
Топтогон акчам кожойкенин сураган баасына жетпегендиктен, эки күн уктабай, жакындарыман кошумча акча сурап жүрүп алган үйүбүз акжолтой болду. Тойдун артынан той берип жатабыз.
0
