Концерттин датасы – 7-май
Өткөн орду – «Ала-Тоо» борборунун амфитеатры
Башталышы – 20:00 (1 жарым саат кечикти)
Көрүүчүлөр – Залдын 100 пайызы (туруп көргөндөр да болду)
Алып баруучу – Эрмек Нурбаев
Мыкты номерлер – Анжеликанын «Энекебай», «Сени ойлосом», «Жашоо керемет», Мирбек Атабековдун «Күндөр жаңырат» жана Айкын Төлепбергеновдун «Как дела?» аттуу ырлары
Билет баасы – 500 -700 сом

«Өзгөчө концерт берем» деп Анжеликанын катуу даярданганын сахнанын жасалгасынан эле билсе болот. Түркүн түстүү жарыктар, экрандагы слайддар, оттор жана ар бир ырчыны коштогон бийчилер, акробаттар сахнанын көркүн ого бетер ачышты. Элди эки саатка чукул күттүргөн концерт башталганда көрүүчүлөр энеси эгиз төрөгөндөй кубанышып, кол чаап эле жатып калышты. Анжелика демейдегиден көп сүйлөп жатканынан, артымда отурган бир-экөө «бул эмне, ичип алганбы?» деп шектене башташты эле, ырчы айым «аябай толкунданып жатам» дегенде гана бас-бас боло түшүштү. Концертте Арсен, Омар, Мирбек Атабеков, Гүлнур Сатылганова, «Style Mix» триосу жана казакстандык конок Айкын Төлепбергеновдор өз өнөрлөрүн тартуулашты. Айкын ырдаганда кыздар тамактары айрылганча кыйкырып, анча-мынчасы жанындагы жигиттерин унутуп коюшту го, чиркин. «Бали», дедим ичимден. Бирок өкүнүчтүүсү, андан соң казак ырчысынан өң десе өң, талант десе таланты жагынан кем калбаган Омар чыкканда, бардыгы момпосуй жутуп алгансып отуруп беришти. Муну байкай койгон Омар «душман көзүнө кол чаап койгулачы» деп суранып жибергенде бир-экөө түштөрүнөн чочуп ойгонушту. Бир сөздү текке кетирбеген Эрмек «Душман деп кимди айтып жатасың?»деп Айкындын чарбагына таш ыргыта тапанданып, ырчыны «неудобный» кылды. Ал эми Мирбек Атабеков болсо ачык айтканыбы же кече ээсинин көӊүлүн алганыбы, айтор, «Кыргызстанда Анжеликадан башка сулуу ырчы айым жок» деп балп эттирбеспи. Соңунда кеченин күнөөкөрү бардык Анжелика аттуу адаштарына белек тапшырып, кызы Айыманын сахнадагы тушоосун кести. Көнгөн адат калабы, көрүүчүлөр бул жолу да ким биринчи чыкса бекер балмуздак жечүдөн бетер, концерт бүтө электе шашыла тышты көздөй четинен чууруй беришти.

Толик сынчы