Футбол боюнча өлкөбүздүн курама командасы АФКнын Чакырык Кубогунун финалдык баскычына жыйынтыктоочу машыгуу сборун Кувейтте өткөрүүдө. Машыгуу сборунун алкагында 12-майда Кыргызстан курама командасы Ооганстан менен жолдоштук оюн өткөрүп, 1:0 эсебинде утулуп калган. Эми ошол эле машыгуу сборунун алкагында 16-майда Кувейтке каршы да жолдоштук оюн өткөрүшмөкчү.
АФКнын Чакырык Кубогунун финалдык баскычы 19-майда Мальдив аралдарында старт алат. Мелдеште 8 команда төрт-төрттөн 2 тайпага бөлүнүп оюн көрсөтөт. Кыргызстан тайпалык баскычта Мальдив аралдарынын жана Палестина, Мьянма өлкөлөрүнүн курама командалары менен беттешет.

АНГЛИЯДА «МАНЧЕСТЕР СИТИ», ФРАНЦИЯДА «ПСЖ» ЧЕМПИОН!
Англиялык «Манчестер Сити» футболдук клубу Англия Премьер Лигасынын чемпиону болду. Чемпиондук күрөш акыркы турга чейин жүрүп, 38-тур чечүүчү оюндарында «Манчестер Сити» өз үйүндө «Вест Хэм» клубун 2:0 эсебинде утуп алды. Бул жеңиш менен чемпиондор топтогон упайларынын санын 86га жеткирди. Манчестер шаарынын атынан чыгып жүргөн бул клуб өз тарыхында муну менен төртүнчү ирет чемпион аталды (буга чейин 1937, 1968, 2012-жылдары уткан).
Ал эми Франция биринчилигинде «Пари-Сен-Жармен» футболдук клубу мөөнөтүнөн мурун Франциянын чемпиону аталды. Златан Ибрагимович ойногон Париж шаарынын командасы ушуну менен өз тарыхында төртүнчү ирет Өлкө чемпиону аталды.

Адилет Керимбек уулу
port@super.kg