Пицца – итальяндардын улуттук тамагы. Адатта ачыган камырдан даярдалып, үстүнө сыр, эт же колбаса жана жашылчалар коюлуп бышырылат. Бирок азыр ачытылбай жасала турган түрлөрү да көп. Анда бышыруунун ушул жолун биз да үйрөнөлү.

ГРЕЧКА ЖАНА ЖАШЫЛЧАЛАР МЕНЕН ПИЦЦА

Керектүү азыктар:
Ун – 250 грамм (жогорку сорт)
Майонез – 350 грамм
Маргарин – 180 грамм
Помидор – 4 даана
Бадыраң – 2 даана
Гречка – 50 грамм
Сыр – 200 грамм
Жумуртка – 1 даана
Туз – татымына жараша

Даярдоо ыкмасы:

• Унга эритилген маргаринди жана майонездин 150 граммын кошуп жууруйбуз. Камыр 2-3 саатка тыныктырылып коюлат.
• Камырды тегерек формага келтирип, үстүнө жука кылып майонезди сүйкөйбүз. Эми чийки 1 даана жумуртканы чалып алабыз да, аны майонездин үстүнөн сүйкөп чыгабыз.
• Помидор менен бадыраңды тегерек же таякча кылып кесип, камырдын үстүнө жайгаштырабыз. Сырдын жарымын майдалап туурап, помидор менен бадыраңдардын арасына чачабыз.
• Кезек жуулуп, кайнаган ысык сууга 10 мүнөт кармалган гречканы пиццанын үстүнө себелөөгө келет. Анан сырдын калганын сүргүчтөн өткөрүп, пиццанын үстүнө чачып коёбуз. Майонездин калганын аралатып куябыз.
• Пиццанын даяр камырын 200 градус температурада ысыган электр мешине салып, 25-30 мүнөт коёбуз.

КОЛБАСА МЕНЕН ПИЦЦА

Керектүү азыктар:
Ун – 100 грамм (жогорку сорт)
Каймак май (сливочное масло) – 100 грамм
Жумуртка – 1 даана (сарысы керектелет)
Пияз – 2 даана
Колбаса – 100 грамм
Помидор – 3 даана
Сыр – 50 грамм
Өсүмдүк майы – 4-5 аш кашык
Туз – татымына жараша

Даярдоо ыкмасы:

• Алгач унга эритилген каймак майды, тузду кошуп, камыр жууруп, 30 мүнөттөн 1 саатка чейин тыныктырып коёсуз.
• Көмөч казанга майды куюп, шакекче кылып ичке тууралган пиязды 2-3 мүнөт кууруйбуз.
• Камырды жука жайып, тегерек формага келтирип, үстүн жумуртканын сарысы менен майлайбыз.
• Камырдын бетине куурулган пиязды, анан тегерек кесилген колбасаларды жайгаштырабыз. Помидорлор да тегерек формада жука кесилип жайгаштырылат.
• Сырды сүргүчтөн өткөрүп, пиццанын бетине себелейбиз.
• 200 градуста ысыган электр мешинде 15-20 мүнөт бышырабыз.

Эскертүү: эгер колбаса жок болсо, анда этти майда туурап кууруп алып, колбасанын ордуна кошсо болот. Пиццанын бетин петрушка менен кооздоп койсо көрктүү көрүнөт.

КОШУМЧА

• Пиццанын камырын жука да, калың дагы кылсаңыз болот. Калың болгон учурда 220-240 градус ысыкта бышырууга туура келет.
• Сыр – пиццаны даамдуу кыла турган негизги азык. Аны пиццага себелеп да, туурап да кошсо болот.
• Жаңы жашылчалар жок болгон кезде, алардын ордуна туздалгандарын колдонуу туура.
• Жаңгактардан кешью, мистени (фисташка) майдалап пиццага кошууга да мүмкүн. Алар азыкка өзгөчө даам берет.

Айымдар, сизде тиричилик үчүн керек болгон пайдалуу кеңештер, дасторконду жасалгалоо, түрлөп тамак бышыруу баш ооруңуз болсо, мындан ары ал маселеңиз жоголот. Гезитибиздин ар санында «Кожойкенин бурчу» рубрикабыз сиздер үчүн кызмат кылат. Сунуштарыңыз, сурооңуз болсо (0312) 32-33-28 номерине чалып же kenesh@super.kg дарегине кат жазсаңыз болот.

Нурдана Бегимаалы кызы
kenesh@super.kg