Латвиянын Юрмала шаарында жыл сайын өткөрүлчү “Жаңы толкун” эл аралык сынагына 12-июлда мекенибиздин атын коргоо үчүн быйыл “Style Mix” триосу жана аларды колдоп ырчы Омар, продюсери Миргүл Эсеналиева кетти. Сынак 22-июлдан 27-июлга чейин жүрөт, ага чейин чогулган катышуучулардын репетициядан башы чыкпай, кызуу даярданып жатышкан кези...

– Салам! Юрмаладагылар силерди кандай тосуп алышты?
Миргүл Эсеналиева, топтун продюсери:
– Салам, аябай жакшы тосуп алышты. Азыр сынактын бардык катышуучулары менен чогуу мейманканада жашап жатабыз.
– Жалпы канча өлкөнүн өкүлдөрү бар?
– 13 мамлекеттен катышуучулар келди.
– Кантсе да бул сынак да, тымызын атаандашуу байкалса керек?
– Азырынча баарыбыз доспуз (күлүп). Атаандаштыкты байкай элекпиз.
– Атактуулардан кимдер менен таанышуу мүмкүнчүлүгү болду?
– Орусиянын шоу-бизнесиндеги атактуулар 20-июлда келишет экен.
– Топтун мүчөсү Илиманын сынак алдында тамагы ооруп калганын көргөнбүз. Бул маселе кандай чечилди?
– Кудайга шүгүр, доктурлар жазып берген дарыларды ичип жакшы болуп калды.

Аталган триону колдоп барган ырчы Омарды да кепке тарттык.
– Кандайсыз? Сиз бул сынактын мурдагы катышуучусу катары кандай өзгөрүүлөрдү байкадыңыз? Бул жылы кандай артыкчылык же кемчиликтер бар экен?
– Жакшы, рахмат. Негизи “Жаңы толкун” өзү жогорку деңгээлдеги сынак эмеспи. Баары эң сонун уюштурулган. Мындан артык болушу мүмкүн эмес.
– Биздин өлкөнүн жеңишке мүмкүнчүлүгү канчалык деп ойлойсуз?
– “Style Mix`те” чындап жакшы ырдаган жаштар чогулган. Бирок башка өлкөнүн катышуучулары дагы жөнөкөй эмес. Ар бир өлкөнүн өкүлү күчтүү атаандаш. Албетте, биз жеңүү үчүн келдик, тилегибиз ошол. Бирок бул сынакка катышканыбыздын өзү деле чоң жеңиш деп эсептейм.
– Сизден башка дагы колдоочулар барыштыбы?
– Азырынча топтун продюсери Миргүл экөөбүз эле. 20-июлда Анжелика менен Арсен учуп келишет.

Сынак деп толкунданып, күн сайын 8 сааттык репетицияны башынан өткөрүп жатышкан “Style Mix” триосунун мүчөлөрүнө да кезек жетип, алар толкундануулары менен бөлүшүштү.
– Даярдыктар кандай?
Илима: – Эртең мененки саат 10дон тартып кечке чейин репетициядабыз. Кызуу даярдык жүрүп жатат.
– Чет элдик атактуулардан кимдерди чыдамсыздык менен күтүп жатасыңар?
– Мен Рики Мартинди жана Валерий Меладзени чыдамсыздык менен күтүүдөмүн. Адилет менен Талас болсо Лара Фабианды күтүп жатышат, анан сөзсүз түрдө Алла Пугачёваны көргүбүз келет.
– Жеңүүгө мүмкүнчүлүгүңөр кандай деп ойлойсуңар?
– Азырынча айта албайм, себеби бардык катышуучулар күчтүү экен.
– Силерге дем-күч берген дагы кимдер болууда?
– Тааныбаган эле адамдар интернет аркылуу жазып бизге ийгилик каалашууда, бул биз үчүн чоң колдоо. Анан Израилден, Америкадан келген катышуучулар атаандаш болгонуна карабай бизге колдоо көрсөтүүдө.
– Талас, Адилет, чет өлкөлүк кыздарга да көз кысып жетишип жатсаңар керек?
Талас: – Жо-ок (күлүп). Таң атпай репетиция башталат, чарчап келебиз, оюбуздун баары сынакта.
– Жан дүйнөңөрдө эмне болуп жатат?
Адилет: –Азырынча баары тынч, бирок ошол эле учурда толкундануу бар. Себеби мекенибиздин намысын коргоо биздин колубузда экенин түшүнүп турабыз. Кыргызстан үчүн биз жеңишке умтулабыз.
– Буга чейин да башка чоң сынактарга катыштыңар беле?
– Бул биздин алгачкы жолу ушундай деңгээлдеги сынакка катышып жатканыбыз.
– Силерге ийгилик каалайбыз!

Нуркыз Курманбек кызы
star@super.kg