45-60 жаш аралыгын “Бальзак курагы” деп атап коёт эмеспизби. Мындай куракта аялдар картаюудан качышып, ар түрдүү жоруктарга барышат. Бири пластикалык хирургдун жардамына кайрылса, кээ бирлери жан дүйнөсүн жашартуу максатында жаш жигиттерди торго түшүрөт. Мындай адаттардан атактуу айымдар да куру калышпаган.

ДЕМИ МУР + ЭШТОН КАТЧЕР
2008-жылы “Woman.ru” айымдар журналынын жүргүзгөн сурамжылоосу боюнча Деми Мур менен Эштон Катчер Голливуддун бири-бирине төп келген түгөйлөрү деп табылган. Булардын баш кошконуна 4 жыл болду. Бирок кыз-жигит болуп жетелешип жүргөндө экөөнүн кесиптештери “Эштон Деминин оюнчугундай” деп мазакташкан учурлары көп кездешчү. Мунун да себеби бар. Анткени түгөйлөрдүн ортосундагы айырма 15 жашты түзөт. Бирок актрисага сүйүүсүн билдирип келе жаткан Катчердин жакындары “экөөнүн ортосунда чыныгы сүйүүнүн бар экени көздөрүнөн эле көрүнөт” дешет. Атактуу айым мурун белгилүү актёр Брюс Уиллистин жубайы болчу. Экөө 3 балалуу болушкан. Бүгүнкү күндө 3 балага ата болуп, тарбия берип жаткан 31 жаштагы Катчер жубайына күндө сүйүү сөздөрүн арнап, сюрприз даярдоодон тажабайт экен.

АЛЛА ПУГАЧЁВА + ФИЛИПП КИРКОРОВ, МАКСИМ ГАЛКИН
Атактуу Алла Пугачёва кү­йөр­ман­да­рын жеке жашоосундагы сенсациялуу кабарлары менен ушул кезге чейин таң калтырып келет. Мисалы, мындан 15 жыл мурун «Пугачёва өзүнөн 18 жаш кичүү Киркоровго турмушка чыкты» деген кабар кимдин гана оозун ачырбаган. Эл арасын “өзүнүн баласы менен тең болуп турса, аны менен кантип жашайт? Киркоров ага атактуу болуу үчүн гана үйлөндү. Ал эми Примадонна болду-болбоду, карыганын сездирбейин деди” деген сөз аралаган. Эмнеси болсо да, кош жылдыз 10 жыл бирге өмүр сүрүшкөн соң эки ажырым жолго түшүштү. Буга мүмкүн башка себептер менен кошо Алланын Филипптен да жаш жигит издегени түрткү болсо керек. Себеби ошол учурда «Примадонна өзүнөн 27 жаш кичүү телеалпаруучу, пародист Максим Галкин менен ысык мамиледе» деген кептер жайылган. “Экөө жакында баш кошушат” деген ушактардын аягы бүгүнкү күнгө чейин тыйыла элек.
Филипп менен Максимден улам элде “Алла карылыкка баш ийбөө жолун жаш жигиттер менен мамиле түзүүдөн табууда” деген түшүнүк жаралган.

МАДОННА + ХЕСУС ЛУС
Үч баланын энеси, Голливуддун гана эмес, бүтүндөй дүйнөнүн атактуу жылдызы Мадонна учурда 51 жашта. Жаш жигиттерди торуна түшүрүүнү ал жакшы билет. Анткени жолдошунан кол үзгөнүнө аз гана убакыт болгонуна карабай, 22 жаштагы модель жигит Хесус Лусту кайырмагына илип алды. Мадонна Хесуска ушунчалык берилгендиктен, учурда ага “ай десең ай, күн десең күндү алып берем” деп турган убагы. Белегинин акыркысы болуп, жигитине үй сатып бергени эсептелет. Ырчы карыганда жаш жигитке тартылып, байлыгы, аброю менен аны тузагына түшүрдү. Ал эми Хесус Лус атактуу айымдын артынан чоң ийгиликке жетишери анык.

НАДЕЖДА БАБКИНА + ЕВГЕНИЙ ГОР
1974-жылдан бери “Русская песня” ансамблин жетектеп келген Орусиянын атактуу Эл ырчысы Надежда Бабкинаны баарыбыз билебиз. Бабкинаны көргөндөр: “Ушул айымдан өзгөчө күчтүү энергия чыгып турат. Сыягы, анда соолубаган энергия булагы болсо керек”,- деп айтышат. Келерки жазда 60 жаш мааракесин белгилейм деп турган ырчынын жан шериги – өзүнөн эки эсе кичүү Евгений Гор. 30 жаштагы Евгенийдин Надежда менен жарандык никеде жашап жатканына быйыл 6 жылга аяк басат. Бабкинанын жакындарынын айтымында, “мыйзамдуу түрдө баш кошолу” деп ырчы айым кеп козгосо эле Гор ордунан так секирип: “Паспорттогу мөөр экөөбүздүн ысык мамилебизди муздатат”,- деп жоошутат экен. Минткен Гордун оюнда эмне бар экенин өзүнөн башка эч ким билбейт. Эл арасында “жаңыдан сахнага чыга баштаган Евгенийге популярдуу бирөөдөн материалдык да, моралдык да жардам керек болчу. Ал ошондуктан Бабкина менен мамиле түзүп келет” деген кептер бар. Бирок алардын 6 жылдан бери ынтымакта жашап жаткандарын эске алгандар “экөөнүн ортосунда чыныгы сүйүү болсо керек” деп божомолдошот.

ЛОЛИТА + ДМИТРИЙ ИВАНОВ
Эч нерседен тартынбаган телеалпаруучу жана ырчы Лолита экинчи күйөөсү, ишкер Александр Зарубин менен жакында эле ажырашкан. Бирок буга кабагым-кашым дебеген Лолита бат эле жаш “бойфрэнд” таап алды. Анын курмандыгы башкалардан айырмаланып, шоу-бизнеске умтулгандардан эмес. Ал материалдык жактан бутуна турган белгилүү теннисчи – Дмитрий Иванов. «Бальзактын курагына» жакындап калган Лолитанын учурдагы сүйүктүүсү Дмитрий андан 12 жаш кичүү. Азыр секелек кыздай “мен сүйүүгө кабылдым” деген ырчынын жүзүнөн бакыт нуру төгүлүп турган кез. Өмүрү спортко кызыгып да, машыгып да көрбөгөн жылдыз бүгүнкү күндө спорт залына каттоодо. Лолита жаш мырзанын жүрөгүн ээлеп алганбы, айтор, анысы үй­лөнүү тууралуу сунуш киргизген. Учурда экөө үлпөт тойго камынышууда.

Бактыгүл Сокушова
star@super.kg