Негизи 14 жаштагы кыз десе жан дүйнөсү таза, оюнда сабак болгон өспүрүмдү  элестетет эмеспизби. Ал эми биз бүгүн кайрылган макалада өспүрүм кыз айдоочусунун каршылык көрсөткөнүнө карабай унаасын айдай качып, токтоп турган 3 унааны сүзүп салган.

ИНТЕРНЕТКЕ ТАРАГАН ВИДЕО ТУУРАЛУУ
Алгач  интернетке тарап кеткен видеого кыскача кайрылсак. Анда үстүндө таксинин фишкасы бар унаа Бишкек шаарынын Жибек Жолу-Исанов көчөлөрүнүн кесилишинде бара жаткан. Ал унаанын алдыңкы эшигине жабышкан жигит бир нече метр жерге чейин сүйрөлүп барып түшүп калган. Унааны башкарып бараткан айдоочу катуу ылдамдыкта баратып жол чыракта токтоп турган 3 автоунааны сүзгөн.
Көп өтпөй бул унааны башкарган 14 жаштагы өспүрүм кыз экендиги билинди.
Жигити менен уруша кетип, анын унаасын айдай качыптыр. Ал тургай кыз тууралуу «сойку болуп иштейт экен», «жаман жүрүм-туруму үчүн укук коргоо кызматтарында каттоодо турат имиш» деген маалыматтар тарап кетти. Бирок таксист менен өспүрүм кыздын ортосундагы эмне болгон мамиле экендиги табышмак бойдон калды.

«АПАСЫ КАЙДА ЖҮРӨТ КАРАБАЙ?»
Бул видео SUPER.KG порталына жүктөлөрү менен кыздын, анын ата-энесинин дарегине бир топ пикирлерди жазып жатышты. Кээ бири өспүрүм кыздын абакты көрүп чыгышын туура деп эсептесе, кээ бирлери татыктуу тарбия бербеген ата-энесин сындап жатышты.
jamalym: – 14 жашыбызда биз апабыздын койнунан чыкчу эмеспиз. Жигитке балээ барбы, 14 жашар кызга?.. Апасы кайда жүрөт карабай?                                     
snejinka: – 14 жаштагы кыз 1986-жылы туулган таксист жигити менен таңкы 6да уруша кетип, машинасына жигитин сүйрөтүптүр. Укмуш...
jasi: – Эсиңди чыгарчу окуялар көбөйүп баратат го. 14 жаштагы кыз экенине ишенбей жатам. Анан да таңкы саат 6 десе ойлонуп калат экенсиң.

ИШ «БАС-БАС» БОЛДУ
Бишкек ШИИББинин маалымат кызматынын билдирүүсүнө караганда, жол кырсыгы катталгандан көп өтпөй кыздын ата-энеси жетип келишкен жана кырсыктан жапа чеккен унааларды оңдоп бермекчи болушкан. Ошондуктан жабыр тарткан тараптар эч кандай доолору жок экендигин билдирип, өспүрүмдүн үстүнөн арыз жазышкан эмес.
Бактыга жараша, бул окуяда адам өмүрүнө коркунуч жаралган жок.  Бирок, мунун арты чоң кесепеттерге алып келиши да мүмкүн эле.

Айчүрөк Мансурова
koom@super.kg