Учурда биринин артынан бирин улай хит ырларды жаратып жаткан ырчы Гүлжигит Сатыбеков тууралуу кызык кеп уктук. Ырчы мырза жакында ата болот дешүүдө. Бизге жеткен маалыматтарга караганда, Гүлжигиттин жүрөгүн оштук кыз багындырып, жакында көз жарат экен. Мындай жаңылыкты угуп ырчы мырзага кайрылбай коё албадык. Гүлжигит Сатыбеков бул тууралуу: “Балким, ушундай кеп чыгаргандан бирөө-жарымдын табасы канар. Андайларга теңелгим да келбейт. Менин эч кандай үй-бүлөм жок”,- деп жооп берди.
"Үй-бүлөлүү экен" деген кеп Гүлжигит менен эле токтоп калбай, Омарды да көптөн бери ээрчип жүрөт. Жадакалса айрым социалдык тармактардын колдонуучулары Омардын жубайы менен уулу деп сүрөттөрдү жүктөгөндөр да болду. Буга чейин бул көрүнүш тууралуу ооз ачпаган Омарды сөзгө тартканыбызда: "Эгерде мен үйлөнчү болсом, бул жагымдуу кабарды алгачкылардан болуп кыргыз элине жарыялайм. Азыр мен бойдокмун. Албетте, менин артымдан мындай кеп ээрчигенине капаланып турам",- деп жооп берди. Демек, мырзалардын жүрөгүн багындыргысы келген бийкечтерде мүмкүнчүлүк дагы деле бар экен.