– Ата-энем 2008-жылы айылдашынан 10 миң сом карыз алып, 2010-жылга чейин үстөк пайызын кечиктирбей төлөп келишкен. 2010-жылы агам операция болгондугуна байланыштуу акча тартыш болуп, карыз төлөнбөй калган. 2014-жылы баягы киши келип «карызыңар үстөк пайызы менен
1,5 миллион сом болду» деп жерибизди талашып, сотко берем деп жатат. Карыз алганда нотариус тарабынан документтештирген эмеспиз. Бирок ата-энем ал кишиге тил кат жазып берген. Эми эмне кылабыз?

Сайкал, 26 жашта, Жумгал

– Эгер тил кат 2008-жылы жазылган болсо, анда бул боюнча ата-энеңизге карыз берген адам акчаны өндүрүү максатында сотко бере албайт. Анткени сотко тил каттын жазылуу мөөнөтүнөн баштап 3 жылга чейинки убакытта гана кайрылууга болот. Анан дагы карызды үстөк пайызы менен кошо 1,5 миллион сом кылып өндүрүп алуу аракети акталбайт, анткени учурда сүткорлук аракетти чектөө жаатында мыйзам иштейт.

Сиздердин сурооңуздарга Бишкектеги «Фемида» юридикалык компаниясынын жетекчиси АЗИЗ ТОКТОСУНОВ жооп берди.

«Адистин кеңеши» рубрикабыз сиздер менен бирге иш алып бармакчы. Юридикалык, медициналык, психологиялык кеңешке муктаж болсоңуз, бизге кайрылыңыз. Суроолорду (0312) 32 33 26 номери аркылуу берсеңиздер болот же kenesh@super.kg дарегине кат жазыңыз.

Канымжан Усупбекова
koom@super.kg