– Өзүм бойдок болгон соң интернеттен өз теңимди из­дөө адат болуп калган эле. Күндөрдүн биринде Гүлнур аттуу келин менен таанышып калдым. Келбеттүү, көздөрү сырдуу тиктеген Гүлнур күйөөсү менен ажырашка­нын, эки баласы бар экенин баяндады. Ошону менен экөөбүз кат жазышып жүрүп, жакын боло баштадык. Кээде ал жашоодон жадай тургандыгын кеп кылар эле. Анда мен «антпе, балдарың үчүн болсо да жашашың керек» деп акыл айтып калчумун.
Жай келгенде өзүм жашаган Ош шаарынан Бишкекке иштегени кеттим. Ал жакта жүрүп да Гүлнур менен байланышымды үзгөн жокмун. Убакыт өткөн сайын ал мени өзүнө тартып, сүйүп калганымды билдим. Кайра Ошко келдим. Экөөбүз кездештик. Ал мени уялыңкы көз карашы, назиктиги менен ого бетер арбап алды. Ошол күндөн тарта кыз-жигит катары жолугуша баштадык. Анан үйдөгүлөр мени иштеп келүүгө Орусияга жиберип ийишти. Ошол күндөн бери экөөбүздүн бири-бири­бизге болгон сагынычыбыз улам өсүүдө.
Мен ата-энемдин жалгыз уулу болгондуктан, алар менин 2 балалуу келинди алам дегениме каршы болору анык. Гүлнур «мага айтпай үй­лөнүп ал, укканымда бир-эки күн ыйлап басылам да» деп айтып келет. А менин башка кызга көңүл бурмак турсун таанышуудан качып, Гүлнур менен ооруп жүргөнүмө 2 жыл болду. Эмне кылам, кеңеш бериңиздерчи.

Нуралы, 29 жашта, Ош шаары

– Сиздин баяныңызды окуп, суроолор жаралды. Би­ринчиси, сиз Гүлнурга болгон сезимиңизди канча­лык чыныгы жана күчтүү деп ойлойсуз? Бул жаатта сезимдериңизди талдап көрдүңүз беле? Экин­чи­си, Гүлнурдун эки баласын өз балаңыздай кабыл алганга даяр­сызбы?
Эгер ушул суроолорго «ооба» деп жооп бере турган болсоңуз, анда ата-энеңизге баарын ачык айтканыңыз оң. Албетте, боло­чок келинин башкача элестеткен алар каршы болуулары мүмкүн. Бирок сүй­лөшкөн ада­мыңыздын жакшы жактарын бел­гилеп, жоопкер­чи­ликти толук мой­нуңузга аларыңызды, жак­шы жашап кетериңиз­дер­ди бел­ги­лесеңиз, балким, алар кө­нүшөт.

Сиздердин сурооңуздарга «Альтернативаларды алдыга жылдыруу» коомунун координатору, психолог ПЕРИЗАТ АСЫЛБАЕВА жооп берди.

«Адистин кеңеши» рубрикабыз сиздер менен бирге иш алып бармакчы. Юридикалык, медициналык, психологиялык кеңешке муктаж болсоңуз, бизге кайрылыңыз. Суроолорду (0312) 32 33 26 номери аркылуу берсеңиздер болот же kenesh@super.kg дарегине кат жазыңыз.