– Кайненем мени жаман көрөт, андыктан баласы менен жашаткысы келбей мени кетиртип жиберген. 8 айдай болуп калды. Бирок күйөөм менен мамилем жакшы, ал келип турат. Анын үстүнө ортобузда бир балабыз бар. Кайненем күйөөмө «аялыңды алып келбе, башкага үйлөнөсүң» дегени деген. Ушундан улам күйөөм же бизди, же апасын кыя албай, ортодо аябай чайналып жүрөт. Апасынан бөлүнүп жашайлы десек жолдошум үйдүн кичүү, ата-энесинин колунда кала турган баласы. Эмне кылсам болот, ойлонуп башым катты?

Зеби, 26 жашта, Токтогул району

– Сиздин көйгөйдү чечиш үчүн чыр-чатактын себе­бин табуу керек. Мисалы, кайненеңиз эмне үчүн сизге каршы болуп жаткандыгын. Мүмкүн, ал жаңылып жаткан­дыр. Бирок кары адамдын оюн өзгөртүү оор иш. Ошондуктан аны түшүнүүгө аракет жасооңуз зарыл. Ал кандай мүнөздөгү, кандай иш кылган келиндүү болууну эңсегенин ойлонуп көрүңүз. Чынында ар үй-бүлөнүн жазылбаган эрежелери болот, андыктан келин ал эрежелерди кабыл алууга аракет жасоосу зарыл. А сиз, мүмкүн, ал эрежелерди кабыл алгыңыз келбейт.
Сиз үй-бүлөңүздү сак­та­гыңыз келсе, жолдошуңузга кылган кемчиликтериңизди ачык айтып, апасы менен тил табы­шып жашоого даяр эке­ни­ңизди айтыңыз.
Анан да айтаар кеңеш, үй-бүлөдө туруктуу орун табуу үчүн иштей турган иши­ңиз­дин болуусу же үй иштерин мыкты алып кетүүңүз керек. Чөйрөдө сиздин аброй өсүп турса, кайненеңиздин деле пикири жакшы жакка өзгөрүшү мүмкүн. Анын үстүнө эч кимге көз каранды болбойсуз, жолдошуңуз да сизди батымдуу көтөрмөлөйт дегендей.

Сиздердин сурооңуздарга «Альтернативаларды алдыга жылдыруу» коомунун координатору, психолог ПЕРИЗАТ АСЫЛБАЕВА жооп берди.

«Адистин кеңеши» рубрикабыз сиздер менен бирге иш алып бармакчы. Юридикалык, медициналык, психологиялык кеңешке муктаж болсоңуз, бизге кайрылыңыз. Суроолорду (0312) 32 33 26 номери аркылуу берсеңиздер болот же kenesh@super.kg дарегине кат жазыңыз.

Канымжан Усупбекова
kenesh@super.kg