Экономика министри Темир Сариев президент Алмазбек Атамбаевге кайрылып, банк уячалары боюнча ишти текшертип чыгууну өтүндү.
Министр мамлекет башчыга кайрылуусуна анын жана Бекназаровдун сүйлөшүүсү катары 2010-жылы жарыяланган маалыматтар кайрадан көтөрүлүп жатканы себеп болгондугун айтат. Анда телефон аркылуу сүйлөшүп жаткан Бекназаров менен Сариевдин үндөрүнө окшош адамдардын экс-президент Бакиевдин жакындарына таандык банкта сакталган акчаны өздөрүнө ыйгарып алуу тууралуу акылдашуусу жазылган.
Сариев бул боюнча Башкы прокуратура менен Эсептөө палатасы текшерүү жүргүзүп, жыйынтыгында өзү тараптан банктагы акчаны менчиктештирип алуу же башка бир мыйзам бузуулар болбогондугу аныкталганын айтат. Буга катар “мен бул акчаларды өзүмө ыйгарып ала алмак эмесмин. Мындай максатым да жок эле” деп кошумчалайт да, аягында президенттен компетенттүү органдарга банк уячалары боюнча ишти дагы бир ирет текшертип чыгууну өтүнгөн.

Наргиза Бекжанова
Мирлан Өмүралиев
politika@super.kg