Ош шаардык прокуратурасынын кызматкери Канжар Кадыралиевге издөө жарыяланды. 18-ноябрь күнү Ош шаардык соту тергөөгө келбегендигине байланыштуу К.Кадыралиевди камакка алуу чечимин чыгарган.
Буга чейин Башкы прокуратура Ош шаардык прокуратурасынын кызматкери Канжар Кадыралиевге карата “бейбаштык”, “өзүм билемдик” жана “зомбулук көрсөтүү менен акча талап кылуу” беренелери боюнча кылмыш ишин козгоп, ээлеп турган кызматынан бошоткон эле.
Эске салсак, Өзгөн районунда жашаган Сактан Келдибаев аттуу ишкердин туугандары Канжар Кадыралиев ишкерди коркутуу жолу менен кафель чыгарган заводун тартып алууну көздөп жатканын айтышкан. Анын артынан Абдиматалип Бекташев аттуу адам К.Кадыралиев коркутуу жолу менен анын ижарага алып жүргөн жер тилкесин тартып алганы жатканын айтып, укук коргоо органдарына кайрылган. Буга катар 2010-жылы каза тапкан “Чёрный Айбек” лакап аты бар криминалдык авторитет Айбек Мирсидиковдун апасы да милицияга кайрылып, Канжар Кадыралиев анын уулунун 25 жылкысын айдап кетип, акысын бербей койгону боюнча арызданган. Прокуратура кызматкеринин дарегине түшүп жаткан мындай арыздар “Ошто кримчөйрө менен бийлик аралашып кетти” деген сөздө чындык бар экенин айгинелейт.

Наргиза Бекжанова
Мирлан Өмүралиев
politika@super.kg