«АЛ МЕНИ КАРАПАЙЫМ СТУДЕНТ КЕЗИМДЕ СҮЙДҮ...»
Бул жүрөк сырын жазып жатканымдын себебин өзүм да тү­шүнбөй турам. Менин катамды эч ким кайталабасын деген үмүт менен болсо керек. Өзүм тууралуу көп нерсе айта албайм. Атым Нурбек, сахна адамымын. Сүйлөшкөн кызым бар, экөөбүз мен ырчы болгонго чейин эле таанышканбыз. Ал мени азыркыдай атактуу эмес, карапайым студент кезимде сүйдү, азыркыга чейин сүйөт деп ишенем. Баса, сүйүктүүмдүн аты Дина. Мен дагы аны сүйөм, бешенеме жазган бактым ушул деп билчүмүн. Бирок сахна мени өзгөртүп салды. Кыял-жоругум, адамдарга жасаган мамилем өзгөрдү, аны менен кошо сүйүктүүмө болгон оюм дагы өзгөрүлдү.
Дина кайгырсам кошо кайгырып, ийгиликтериме менден өтүп кубанып, жанымдан жарым карыш алыс чыкпай жүргөндүктөн «ал эми кайда бармак эле» деп ойлой баштадым. Негедир «мени менен жашаганына ал өмүр бою бактылуу болуп өтөт» дедим. «Элдин адамымын, замандан артта калбашым керек» деп түнкү клубдардын босогосун тез-тез аттачу болдум. Социалдык тармактардан түрдүү кыздар менен сүйлөшөм.
– Кыздарыӊ эле көбөйүп кетти. Мага болсо убактыӊ жок,- деди тынчсызданган Дина.
– Бул күйөрмандарым да, аларга жооп берүүгө мил­дет­түүмүн.
Шайтандай өзүнө чакырган кыздар жылмайып карасаӊ эле өздөрүн арнап жиберүүгө даяр. Эмнеге аларды колдонбошум керек? Миӊ түркүн кыз менен таӊдарды атырдым. Мен мындай жашоого кайсы күнү келип калганымды өзүм да билбейм. Эгерде ушул окуя болбосо дагы деле күндүзү уктап, түндөсү жашап жүрө бермекмин.

«ЭСТЕН КЕТКИС ТААНЫШУУ...»
Күтүлбөгөн окуяга туш болдум, ошондо гана менин көзүм ачылды. Адаттагыдай социалдык тармактан сулуу кыздарды капканга түшүрүү үчүн аӊчы болуп отургам. Өзүм «жолугалы» дебейм, мен деген «жылдызмын» да. Күт­көнүмдөй эле чырайы келишкен кыз жазып калды, аты Бегимай экен. Аны эркелетип дароо эле Бема деп алдым. Эркелетсеӊ күйөрман кыздар ээрип кетишерин жакшы билем да. Сүрөттөрүн карап чыксам тимеле укмуш. Жашаган жери, кийген кийими, астында унаасы бар, кыскасы, кыялымдагыдай кыз туюлду. «Жолугалы» десем, «чет өлкөдөмүн, барайын» дейт. Ошентип, экөөбүз жолукпай туруп эле сүйүшүп калдык. Сулуулукка суктанып, эс-учумду жоготуп коёр жан экенимди ошондо билдим. Анысы турсун жеткен акылсыз экенимди дагы ошондо байкабадымбы.
Динаны такыр эстебейм, ага чалбайм, жазбайм. Ал байкуш бир нерсени сезгендей чырылдайт. Менин интернеттеги махабатым ансайын от алат. Ичимден «ушундай сулуу, бай кызга үйлөнүп алсам башка ырчы жигиттердин ичтери күйөт» деп кымыӊдап алам. Акыры Бемага үйлөнүү тууралуу сунушун киргиздим. Ооба, ушул кадамга адамды бир ирет көрбөй туруп барганыма өзүм да таӊданам. Динага чалып, башканы сүйүп калганымды, үй­лөнөрүбүздү айтып, Беманын сүрөтүн жибердим. Акырында менден көӊүлү биротоло калсын деп «көрдүӊбү, кандай сулуу кызга үйлөнгөнү жатам? Убара болбо, баары бир сага кайта албайм, аны катуу сүйүп калдым» дегенимчи. Азыр эстесем уялганымдан жерге кирип кетейин дейм.
– Балким, ойлонорсуӊ?- деди ал.
– Сөздүн кыскасы ушул,- дедим кыйынсынып.
Ошол күнү кечинде эле Дина мага СМС жазыптыр, мен ашык болуп жүргөн кыз казак кызы, турмушка чыккан жана бир уулдун энеси экенин айтыптыр. Менин күйөрманым мени менен сүйлөшүүнүн айласын издеп, казак кызынын сүрөттөрүн колдонуп, социалдык баракчасына жүктөп алып ушул кадамга барыптыр. Алгач ишенбей, Дина ич күйдүлүк кылып жатат дедим. Бирок ушул эле сүрөттөр менен ал дагы бир нече ырчы жигиттерди кайырмагына илгенин уктум. Динанын алдында катуу уялдым. Аны көргөндө көзүмдү дароо ала качам. Бирок мени чындап сүйөрүнө ынандым. Ишенесизби, окурман, ал мени кечирди.
– Мындай нерсе баарында болот, бул окуяны унутуп коёлу,- деди акылдуум. Ошентсе да мен мындай кызды бактылуу кыла аламбы? Деги мен анын сүйүүсүнө татыктуу кишиминби? Жооп бере албайм, бирок аны менен азыр да биргемин. Балким, дагы андан ашкан сулуу көзүн кысса, азгырылып кетип калсам, Дина эмне болот? Азыр эле эки ажырым жолго түшүүнү сунуштасамчы? Себеби социалдык тармактагы аӊчылыгымды дагы деле токтоткон жокмун. Көзүм ачылды дейм, бирок ажарлуу айымды көргөндө шилекейим чууруп каларын баары билишет. Эмне кылам? Башым катып калды.

Нурбек

Нуркыз Курманбек кызы
lira@super.kg