Үстүбүздөгү жылдын 22-январь күнү Нарын облусунун Жумгал районундагы Таш-Дөбө айыл өкмөтүнүн башчысы Надырбек Бийсеев өз айылдашын атып салган. Октон оор жаракат алган жаран ооруканадан каза болгон.
Бул окуя боюнча айрым массалык маалымат булактарында айыл өкмөт башчысы буга чейин 2 жолу соттолгон Мунарбек Салидинов аттуу жергиликтүү тургун үйүнө кирип келип, коркутуп-үркүтүп акча талап кылгандыгы үчүн аны мылтык менен атып салгандыгы, маркум буга чейин айылдаштарынын жүрөгүнүн үшүн алып келгендиги айтылган эле. Коомчулукта ар түрдүү пикирлер жаралып, кээ бирлери бул окуяны өзүн-өзү коргоо катары баалашууда.
Булардын баарына көз жумуп коё албаган маркум Мунарбектин атасы Абылбек Салидинов айрым маалыматтарды тактап коюу максатында редакциябызга баш бакты:
– Мен уулумду актоо эмес, айрым маалыматтарды тактоо максатында сиздерге кайрылып отурам. Азыр айрым массалык маалымат каражаттарында уулумду «зек» дешип бир тараптуу маалыматтар жазылууда. Уулумдун күнөөсү болсо болгондур, анын буга чейин эки ирет уурулук кылганы үчүн соттолгону чындык. Бирок окуя буга чейин айтылып келгендей Надырбектин үйүндө эмес, биздин үйдө болгон.
Мунарбек улуу уулум эле. Бала кезинде чоӊ атасынын колунда чоӊойгон. Бишкекте өзүнчө батирде жашап, ширетүүчү болуп иштечү. Уулум эл сүрөттөп жаткандай зөөкүр, каракчы эмес. Жаркылдаган, жан дүйнөсү назик болчу. Ыр жазып, ырлары гезит бетине жарыяланып турчу. Балким, жаман жактарын бизге көрсөтчү эмес беле, ким билсин? Келинчеги менен ажырашып кеткен, артында бир уулу калды. Каргашалуу окуя болордо бир классташы «айылга барып кой алып келмекмин, жаныма шерик болуп барып келчи» деп суранып алып кетиптир. «Эртеӊ Бишкекке чыгабыз» деп жатканда ушул окуя болуп жатат. Элден угушумча, айыл өкмөт башчысы экөө 2 ай мурун уруша кетишип, кайра элдешкен экен. Уулум акыркы ирет барганында да экөө жолугуп, чогуу арак ичишип, ал жерден кыжылдашып, анан тарап кетишиптир. Анан бир сааттан кийин Надырбек үйүнө барып мылтык көтөрүп келип, чоӊ атасынын үйүндө жаткан уулумду телефон чалып чакырып, дарбазадан чыгып келатканда атыптыр. Мен барганда боз үй тигилип калыптыр, боз үйдүн тегерегинин баары кан экен. Милиция кызматкерлери Надырбекти алып келишип, окуя кандайча болгондугу тууралуу көрсөтмө алышкан. Өзүм юрист болбосом да, өз үйүнөн аткан менен бирөөнүн үйүнө барып атып салгандын жазасы эки башка экенин түшүнөм. Уулум тууралуу ушактар калп. Балам шаарда жашаса, айылга кайдан эки күндүн биринде барып тынчтык бербей, элди коркутуп-үркүтмөк эле? Же мурда ал бирөөнү тоноп, уруп-сабагандыгы тууралуу милицияга арыз түшпөсө, кантип оозу-мурду кыйшайбай ушуну айтып жатышат? Надырбек тууралуу да элден жакшы кептерди угуп жүрчүмүн. Экөө чатакташса, демек, күнөө эки тарапта теӊ бар да. Анан Надырбекти актап, менин уулумду каралаган туура эмес. Бизге Надырбектин туугандары келип кечирим сурашкан. Анын үстүнө туугандык да жайыбыз бар болгондуктан биз милиция кызматкерлерине арыз жазбай, өз ара тынышып алдык.
Надырбек Бийсеев учурда камакта. Ал эми кылмыш иши боюнча Жумгал райондук прокуратурасы тергөө жүргүзүп жаткан чагы.

Асхат Субанбеков
koom@super.kg