14-февраль – Ыйык Валентин күнү деп майрамдоо акыркы убактарда Кыргызстанда да күч алды. Бул күндү сүйүшкөндөр эсте калчудай жагымдуу өткөрүүгө аракет кылышат. Тилекке каршы, бир үй-бүлө үчүн быйыл бул майрам трагедия менен аяктады...

ОКУЯНЫН ЧОО-ЖАЙЫ
Үстүбүздөгү жылдын 15-февраль күнү таӊкы саат 6:20 чамасында Бишкек шаарынын Октябрь РИИБинин нөөмөт бөлүмүнө аялдын жансыз денеси табылгандыгы тууралуу маалымат түшкөн. Ыкчам иликтөө тобу окуя болгон жерге барып, борбор калаадагы Токтоналиев көчөсүндөгү үйлөрдүн биринин конок бөлмөсүндө диванда чалкасынан жаткан аялдын жансыз денесин көрүшкөн. Анын киши колдуу болуп өлгөнү көрүнүп турган. Маркумдун аты-жөнү такталып, ал 25 жаштагы келин болуп чыккан. Бул окуя боюнча кылмыш иши козголуп, маркумдун жакындары суракка алынган. Көп өтпөй кылмышка шектүү катары маркумдун 1981-жылы туулган күйөөсү колго түшүрүлгөн.

«КЫЗЫМ МЕНЕН КҮЙӨӨ БАЛАМ КҮНДҮЗ ЭЛЕ УРУШУП ЖАТЫШКАН»
Маркумдун атасы, Рухий-Мурас жаӊы конушунун тургуну тергөөдө төмөнкүчө көрсөтмө берген:
– Кызым менен күйөө балам 2014-жылдын октябрь айында баш кошушкан. 14-февраль күнү кызым мага кечки саат 17:30дарда телефон чалып үйүнө чакырды. Барсам жалгыз экен. Балалуу бололу десе күйөөсү каршы болуп жаткандыгын, анын айынан экөө чатакташа кеткендигин мага айтып берди. 15-20 мүнөттөн соӊ күйөө балам келип «биз өзүбүзчө сүйлөшүп алалы» деп кызым экөө эшикке чыгып кетишти. Арадан бир сааттай өткөн соӊ келишип, кызым «сиз үйгө бара бериӊиз, биз өзүбүз чечишип алдык» дегенинен үйүмө кетип калгам.
15-февралда таӊкы 5 жарымдар чамасында күйөө балам мага телефон чалып, «үйгө келе калыӊызчы, «Тез жардам» кызматкерлери келинчегимди эсине келтире албай жатышат» деди. Аны угар замат уулумду жаныма алып күйөө балам менен кызымдын үйүн көздөй жөнөдүк. Орто жолдон күйөө балама телефон чалып, аны менен Ахунбаев көчөсүнөн жолуктук. Ал биздин машинага отуруп, «үйдө врачтар бар, силер үйгө кире бергиле, мен азыр кирем» деп май куюучу жайдын жанынан калып калган. Биз үйгө кирсек «Тез жардам» кызматкерлери жок экен, кызым диванда өлүп жатканын көрүп милиция кызматкерлерин чакырдык. Күйөө балам болсо ошол боюнча качып кетти.

«КЕЛИНЧЕГИМ МАС БОЛГОНДУКТАН СООЛУКТУРАЙЫН ДЕГЕМ»
Кылмышка шектелген маркумдун күйөөсү ошол эле күнү милиция кызматкерлери тарабынан кармалды. Ал тергөө учурунда төмөнкүдөй көрсөтмө берген:
– Ошол күнү жубайым экөөбүз уруша кеттик. Кайнатам келгенде экөөбүз өз ара сүйлөшүп чечишип алдык. Анан жубайымды Сүйүү күнү менен майрамдатып коёюн деп шаардагы түнкү клубдардын бирине алып бардым. Ал жактан келинчегим спирт ичимдиктерин ичип, кызуу болуп калды. Ортодогу кызганычтын айынан дагы уруш чыгып, экөөбүз үйгө келдик. Мен аны катуу сабаган эмесмин, соолуктурайын деп жулкулдаткам. Бир кезде ал эси ооп жерге жыгылып кеткенде мен да анын үстүнөн баса жыгылдым. Ошол боюнча эсине келген жок.

«БАШЫНА ТИЙГЕН КАТУУ СОККУДАН КАЗА БОЛГОН»
Бул кылмыш боюнча Бишкек ШИИББинин басма сөз кызматкери Мырзабек Токтосунов төмөнкүлөрдү билдирди:
– Кылмышка шектүү катары маркумдун күйөөсү кармалган. Ал күнөөсүн толугу менен моюнуна албай жатат. Учурда Октябрь РИИБинин тергөө бөлүмү тарабынан Кылмыш жана жаза кодексинин 97-беренеси (киши өлтүрүү) боюнча кылмыш иши козголуп, тергөө иштери жүрүп жатат. Тиешелүү соттук-медициналык экспертизалар дайындалып, алгачкы жыйынтыгында маркум башына тийген катуу соккудан улам каза болгондугу аныкталды.
«Той болот, тойдун эртеси да болот» демекчи, майрамдык маанай жаш үй-бүлөнүн кыйрашы менен аяктады. Бири кырчындай курагында көз жумса, экинчиси адам канына забын болуп, кылган күнөөсүнө башын мыкчый өкүнүп жаткан чагы.

Асхат Субанбеков
koom@super.kg