Райкан Алкановго кол салуу фактысына шектелип кармалгандардын экөө үй камагына чыгарылды. Бул тууралуу Талас ОИИБинин басма сөз кызматы билдирди. Маалыматка караганда, 16-февралда Талас шаардык сотунда Райкан Алкановго кол салуу фактысы боюнча шектелгендердин иши каралган. Анда сот 16 жаштагы Динара аттуу кызды үй камагына чыгаруу, ал эми Гүлнара аттуу кызды соттук-психологиялык экспертизадан өткөрүү чечимин чыгарган. Эске салсак, өткөн жылдын 26-октябрында ишкер Райкан Алкановго Талас шаарындагы үйүнөн кол салуу болгон. Бычактан ишкердин ашказаны, көк боору жана боору жабыркаган. Кылмышка шектүү катары 16, 17 жана 32 жаштагы кыздардын кармалгандыгын ИИМ билдирген эле. Кийинчерээк "Супер-Инфо" кармалган кыздардын эӊ кичүүсү 16 эмес, 15 жашта, 9-класстын окуучусу экендигин жазып, кыздын энеси менен болгон маекти жарыялаган.
Айыпталуучулардын жактоочусуна байланышканыбызда, ал жогорудагы маалыматты тастыктады:
– Сот отурумунда судья 16 жаштагы Динараны жашы жете электигине байланыштуу үй камагына чыгарды. Азыр камакта кылмышка шектүү 3 кыздын бири, 23 жаштагы Гүлнара гана калды. Буга чейин 15 жаштагы Бегайым жашы жете электигине байланыштуу үй камагына чыгарылган болчу. Учурда бул иш баштан аяк иликтөө үчүн экспертизага жөнөтүлгөндүктөн токтоп турат. Экспертизанын жыйынтыгы чыккан соӊ кайрадан улантылат.
Башынан эле күдүктүү ойлорду жаратып жаткан бул кылмыш ишинде түшүнүксүз жагдайлар ачылууда. Алсак, ИИМ алгач кылмышка шектүү катары кармалган кыздардын эӊ кичүүсү 16 жашта деп көрсөткөн. Ал эми берки кыздардын жашы 17, 32 деп берилген болчу. Убакыттын өтүшү менен кыздардын чыныгы жаштары ачык айтыла баштады. Тактап айтканда, шектүү катары кармалган кыздардын экөөсүнүн жашы жете электер, 15 жана 16 жаштагылар, үчүнчүсү ИИМ башында билдиргендей 32 эмес, 1990-жылы төрөлгөн, кылмыш болгон маалда 24 жашта экендиги билинди. Муну Талас ОИИБинен тастыкташты. Мындан улам суроо жаралат. Милиция кызматына кыздардын жашын мүмкүн болушунча улуу көрсөтүү тапшырмасы берилди беле? Берилсе кимден? Эмне максатта?