Жалпыга маалым болгондой, 2015-жылдагы өлкөдөгү негизги саясий өнөктүк – бул парламенттик шайлоо. Ушул тапта Жогорку Кеңешке шайлоонун күнү так аныкталбаса да, биздин партияга бут тосууну каалаган айрым саясий күчтөр, кара көө жабууларды күчөтүп жатышканы, партиянын мүчөлөрүн эле эмес, партияга жан тарткан мекендештерибиздин да тынчын алууда. Айта кетсек, «Өнүгүү-Прогресс» саясий партиясынын карапайым калк алдында кадыры өсүп, азыркы реалдуу саясий кырдаалда бүтүндөй республика боюнча иш-аракеттерибизге элибиз оң баасын берүүдө. Кыргызстандын өсүп-өнүгүүсүнө кайдигер карабаган жаштар менен жолугушуубузду айрым саясий топтор туура эмес максатка пайдаланышып, элибизди адаштырганга аракеттенишип жатышканын эске салгыбыз келет. Элибизде айтылгандай, «Жакшыга сөз, жаманга чөп илээшет» экен.
Ошондуктан, урматтуу мекендештер, сиздерди биз тарапка болгон кара көөгө (чёрный пиар) олуттуу маани бербөөгө чакырабыз. «Өнүгүү-Прогресс» саясий партиясынын артында саясий күчтөр эмес, карапайым мекендештерибиз турат. Биздин таяныч – эл!
Терең урматтоо менен «Өнүгүү-Прогресс» саясий партиясынын саясий кеңеши.

Эльвира Караева
politika@super.kg