«Министрдин кызынын махабаты» тасмасындагы тыкылдаган кыз Мадина эсиӊиздеби? Ошондогу актриса Асел Чоткараева учурда үй-бүлө очогун кармаган бактылуу жубай, мээримдүү эне статусуна ээ болуп отурган чагы. Анда Асел менен болгон маегибизге назар салыӊыз.

– Асел, кандайсыӊ? Биз сени «Министрдин кызынын махабаты» тасмасынан жакшы тааныйбыз. Бирок ошол фильмден кийин тасма талаасынан көп кезиктирбей калдык?
– Саламатсыздарбы? Негизи, «Министрдин кызынын махабатынан» кийин эч бир тасмага тартылбайм деп чечкем. Чынында, баарыбыз эле секелек кезде ырчы, актриса, тележылдыз, айтор, белгилүү адам болгубуз келет. Мен да ошол балалык кыялымды ишке ашыргым келди окшойт. Бирок атактуулук мен үчүн эмес экен. Жашырбайм, башында көчөдө таанып, кол тамга сурашса аябай жаккан. Атактуулугум менен сыймыктанып жүргөм. Жаштык кылдым окшойт, кийинчерээк мындан да тажап кеттим.
2009-жылы «Дудук кыз» деген тасмада роль жараттым. Анда режиссёр Ырыс Жоомартова жолдошумдан уруксат сураган. «Мейли, Ырыс эже үчүн тартылып коёюн» деп тартылгам. Ал жакта ойногонум өзүмө такыр жакпай, «ушул акыркысы болсун» деген элем. Себеби мен өзүмө сынды абдан катуу коём. Көрсө, «ат баспайм деген жерин миӊ басат» деген чын экен. Антип айтыштан деле коркуп калдым. Бирок азыр киного тартылууга такыр каалоом жок.
– Акыркы жылдары режиссёрлук ишти аркалап калганыӊды да билебиз...
– Ооба, «Сезим» жана «Үчөө» деген кыска метраждуу тасма тарткам. Бул тасмалар фестивалдарга катышып, бир нече жеӊиштерге жетишти. Режиссёрлуктан өзүмдү таптым. Көрсө, мен актриса эмес, режиссёр болууну каалап жүргөн экенмин. Себеби кадр сыртында жүрүп режиссёрлук иш менен алектенген өзүмө аябай жакты. Эл «кино тартпаган ушул Асел эле калды» деп айтышы мүмкүн. Анткени бизде актёр болобу, ырчыбы же режиссёрбу, баарынын баркы кетип калды. Ким эрте ойгонсо кино тартат, ырдайт, актриса болот. Биздин азыркы ырчы, актриса, режиссёрмун дегендер өзүн сындаганды такыр билишпейт. Сындан адам өсөт. Эки күн аншлаг менен концерт коюп «мен жылдызмын» дегендерге таӊ калам. Мына ошондойлордун айынан да ардактуу кесиптердин баркы кетип жатат.
– Кино тармагындагы эмгегиӊе кайрылсак. Тасма тартууда кайсы темаларга кайрылгыӊ келет?
– Тасмада дайыма коомдогу көйгөйлөрдү чагылдырам. Мисалы, майып адамдарга коомчулуктун жасаган мамилеси, кемсинтүүсү менин жүрөгүмдү дайыма өйүп келчү. Мен бул теманы «Сезим» деген кыска метраждуу тасмамда бере алдым. Аталган тасма 2013-жылы Кореяда 700 кино катышкан кинофестивалдан Гран-прини утуп алды. Ал эми үй-бүлөдөгү кризис, анын балага тийгизген терс таасири жөнүндө «Үчөө» деген тасма тарттым. Өзүмдүн мисалымда эле айтсам, жолдошум экөөбүз 9 жыл чогуу жашагандан кийин үй-бүлөбүздө түшүнбөстүктөр жаралып, жашайбызбы же ажырашабызбы деген тандоого жетип калган элек. Ошондон уулубуз эле жабыр тартты. Көрсө, ата-эне урушканда, ажырашып жатканда баланын ордун дайыма эске алып, ошого ылайыктап жашашы керек экен.
– Үй-бүлөӊөрдө өйдө-төмөн окуялар болгонун айтып калдыӊ. Аны кантип жеӊдиӊер?
– Ооба, биздин үй-бүлө да кризиске кабылган учур болду. Айымдар чычалабай эле коёлу, эркектерге салыштырмалуу акылыбыз бир аз тайкыраак. Ошол учурда туш тараптан бузукулар, акылы жок адамдар мени курчап алышыптыр. Мен ошолордун сөзүнө кирип туруштук бере албай калдым окшойт. Жаман аял кетем деп коркутат эмеспи, мен да кетем деп чыктым. Менин жаш үй-бүлөлөргө берер кеӊешим, эч качан үй-бүлөлүк көйгөйүӊөргө сырттагы адамды аралаштырбагыла. Бул нерсе үй-бүлөнүн бузулушуна алып келет. Бирок сүйүү баарын жеӊет экен. Кичине араздашып жүрүп жолдошум менен кайра табыштык. Чынында, ортобузда аябай күчтүү сүйүү болду. Сүйүү болбосо мынчалык кыйынчылык, тоскоолдуктарга чыдабайт элек.
– Сени Жамал Сейдакматованын келини деп угуп калган жайыбыз бар. Балким, бул тууралуу кененирээк айтып берерсиӊ?
– Ооба, жолдошум Мурат Жамал Сейдакматова менен Болот Шалтаевдин уулу. Учурда «Туӊгуч» театрында иштейт. Аны менен ошол театрда иштеп жүргөндө таанышып калгам. Эми экөөбүздүн үйлөнгөнүбүз өзүнчө бир комедия. Бир том китеп жазса да болот (күлүп). Жолдошум менден 14 жаш улуу. «Турмушка чыгам» дегенимде, апам «жок, чыкпайсыӊ» деп кесе айтып караманча каршы чыкты. Апам өзү аябай тартипке бекем аял. Жаш болсом, өзүмдөн 14 жаш улуу мырзага мени ыраа көрбөдү окшойт. Ары жагынан, бери жагынан өтүп жалдырасам да болбойт. Көчөгө чыгарбай, телефонумду катып, үйгө камап койгон. Эптеп айласын таап жолдошума «сен түнкү саат 3кө келе бер, мен качып чыгам» дедим. Түн жарымда машинасы менен келип сигналын басканда «апа, мен аман-эсенмин, турмушка чыкканы кеттим» деп кат жазып, качып чыктым. Жолдошум экөөбүз анын туулган айылы Шалтага барып, молдого нике кыйдырып үйлөнүп алдык.
– Кайын журтуӊ кандай кабыл алды?
– Абдан жакшы кабыл алышты. Башында жолдошум экөөбүз алардан өзүнчө жашагандыктан келиндик кызматымды өтөй албай калган элем. Балалуу болгондон кийин кайненем Жамал Сейдакматова экөөбүз жакын санаалаштардан болуп калдык. Ал өзү да чыгармачыл адам болгондуктан мени бардык тараптан колдоп, кеп-кеӊешин аябайт. Небересин аябай жакшы көрөт, азыр үйүбүзгө тез-тезден келип турат. Мен үйдөгүлөрдүн каршылыгына карабай турмушка чыккандан кийин апам жарым жылдай таарынып, мени менен сүйлөшпөй жүргөн. Кийин гана мамилебиз олуттуу экенине ынанып жумшарып калды.
– Учурда эмне менен алексиӊ?
– Мен кичинекей балдарга аябай жакынмын. Өзүм да 3 жылга жакын балдар бакчасында музыкадан сабак берип калган элем. Жакында эле балдар театрын ачып ошону иштетип жатам. Буюрса, ал «Ак Шоола» балдар хору сыяктуу чоӊ ийгиликтерге жетет деген тилектерим бар.
– Дос кыздарыӊ көппү, дегеле достукка ишенесиӊби?
– Досторум жокко эсе. Мен кыздар ортосундагы достукка такыр ишенбейм. Дос күтсөӊ да деӊгээли сени менен теӊ адам болуш керек экен. Болбосо досуӊ ылдый, сен жогору болуп турсаӊ көрө албастык сезим ойгонуп кетип, ал нерсе үй-бүлөнүн урашына залакасын тийгизип калышы мүмкүн. Азыр мен ачылып-төгүлүп эч бир курбума сырымды айтпайм. Аны айта турган апам, жолдошум, кайненем бар. Ал эми чыгармачылыктагы достордон Нурзат Токтосунова, Элина Абай кызы менен жакшы мамиледемин.
– Жолдошуӊа 23-февралда эмне белек бердиӊ?
– Эч нерсе. Февралдын ортосунан баштап ооруп үйдө жаттым. Жолдошум мени карап жанымда болду. Майрамга белек бере албай калдым да. Анан жолдошума "сен да мени 8-Мартта ушинтпе, ээ?" деп коём. Ал болсо "өзүӊ айыга албай араӊ жүрүп майрамды айтасыӊ да" деп жылмайып койду.
– Үйүӊдөгүлөрдүн каршы болгонуна карабай турмушка чыкканыӊа караганда жолдошуӊ ошого татыктуу болсо керек?
– Кандай десем, сүйүү бар болсо баарына көз жумса болот. Ушул кезге чейин жолдошум менен катуу урушуп, айтышканым такыр эсимде жок. Ал чынында сүйүүгө татыктуу адам. Аны менен бардык темада сүйлөшө аласыӊ. Абдан билимдүү, менин энциклопедиям десем болот. Китеп окубай эле баарын ошондон сурап алам. Романтика тартуулаганды жакшы көрөт.
– Маегиӊе чоӊ рахмат!

Лунара Бекиева
star@super.kg