Бул апта башкы прокурорлуктан күйөөсүнүн иштеринен улам кетүүгө аргасыз болуп, чоӊ саясатка аттанган Аида Салянованын президент Алмазбек Атамбаевге тиш кайроосу менен уланды.

КООМЧУЛУК АЧЫК ЖООП АЛЫШЫ КЕРЕК
27-февраль күнү УКМК «Тазалык» ишканасына байланыштуу козголгон кылмыш иши боюнча көрсөтмө берип жаткан күбөлөр экс-башкы прокурор Аида Салянованын жолдошу Бакыт Абдыкапаровго кылмыш ишин жаптыруу үчүн 50 миӊ доллар беришкенин тастыкташты» деп билдирүү таратты. Абдыкапаровго карата «алдамчылык» беренеси боюнча айып тагылып, ал Кыргызстандын аймагынан чыгып кетпөө жөнүндө тил кат жазып берген. «Күчтүү Кыргызстан» партиясынын төрагалыгын Саляновага өткөрүп берген Расул Умбеталиев: «Салянованын жолдошу Абдыкапаровго карата козголгон кылмыш иши – бул саясий буйрутма, куугунтукка алуу. Салянованын башкы прокурорлуктан отставкага кетүүсүнө анын күйөөсү себепчи болгон эмес. Башкы себеп анын президенттин чөйрөсүндөгү адамдарга жана азыркы саясатчыларга карата кылмыш иштерин козгоо боюнча бир катар документтерди даярдоосу болгон»,- деп 27-февраль күнү маалымат жыйын берди.
Президент Алмазбек Атамбаевдин кеӊешчиси Фарид Ниязов мамлекет башчы өз чөйрөсүндөгү адамдарга карата Башкы прокуратурада чын эле кылмыш иштерин козгоо боюнча иш-аракеттер жүрдү беле, чын болсо эмнеге тийиштүү процедуралар жүргүзүлгөн эместигин териштирүүнү талап кылганын айтты. «Алмазбек Шаршенович бул тапшырманы башкы прокурор Индира Жолдубаевага берди. Президент Расул Умбеталиев айткан маалымат боюнча Башкы прокуратурада документтер барбы, эгерде бар болсо эмне үчүн алар тиешелүү текшерүү жана кылмыш иштери катары ишке ашкан жок деген суроого коомчулук жооп алышы керектигин баса белгиледи»,- деп Ниязов мамлекет башчынын бул маселе боюнча позициясын билдирди.

УМБЕТАЛИЕВ ӨЗ СӨЗҮН БУРМАЛАЙ БАШТАДЫ
Конкреттүү президенттин айланасындагы кайсы адамдар боюнча кеп кылгандыгын Умбеталиев Башкы прокуратурага айтып бере албады. Тайсалдата «мен Президенттик администрациянын өкүлдөрүн эмес, башкача мааниде айтканмын. Министр, вице-премьер өӊдүүлөрдүн кызматка дайындалышы боюнча жарлыкка президент кол коёт эмеспи. Демек, чиновниктер президенттин айланасындагы адамдар болуп саналат» деп алгач маалымат жыйынында бар деген документтерди көрсөтүүнүн ордуна өз сөзүн бурмалай баштады.
Бул окуя бир нерсени дагы бекемдеп койду. Алгач Аида Салянова өзүн республикада коррупция менен күрөшкөн, анын айынан коррупционерлердин курмандыгы болуп калган адам катары көрсөтүүгө аракет кылды. Кайсы бир деӊгээлде ал максатына жетти. Бирок журналисттерге берген маалымат жыйындагы сөзүндө коррупция менен күрөш президенттин эрки, колдоосу менен жүрүп келгенин өзү кайра далилдеп койду.
Эми минтип паракорлор менен күрөшүүчү имиджин бекемдөө аракети теӊирден тескери жагына кетти.

Эльвира Караева,
Автандил Добулбеков
politika@super.kg