«Мен күчтүү адам экенимди далилдедим» деген жаш актриса Рахат Божокоева бүгүн биздин маек төрүбүздө. Ар түрдүү образды жараткан актрисанын жан дүйнөсү кандай болду экен? Бул тууралуу биз да билгенге аракет кылдык.

МЕН ТУУРАЛУУ...

Аты-жөнү – Божокоева Рахат Нургалиевна
Туулган жылы, күнү – 1994-жыл, 1-август
Туулган жери – Бишкек шаары
Билими – Кыргыз улуттук университетиндеги финансы жана кредит факультетинин 3-курсунун студенти
Тартылган тасмалары – «Сүйөм дечи», «Кекеч», «Көк салкын-2»

• Дайыма үйдөн чыгып баратып бут кийимди алгач оӊ бутума, анан сол бутума кием.
• Кийимди көбүнчө апам белекке бергендиктен, кээде «бул көйнөгүӊдү кайсы жерден алдыӊ?» деп сурашса, эмне дешти билбей туруп калам.
• Китеп окуганды жакшы көрөм. Эгер эч ким тийишпей, кыларга ишим жок болсо, 2 күндө бир китепти окуп бүтүп коём.
• Күзгүнүн алдында ашып кетсе 20 мүнөт кармалам.
• Уктаарга жакын сөзсүз кайнак суу же сүткө бал кошуп ичем.

– Салам, Рахат! Экөөбүз акыркы жолу маек кургандан бери бир топ убакыт өтүптүр. Бул убакыт аралыгында эмне менен алектендиӊ?
– Салам! Ооба, жыл ичинде «Кекеч», «Сагын» аттуу тасмаларга тартылдым. Азырынча жашоом киного тартылуу жана окуу менен чектелип жаткандыктан мактанарлык өзгөрүүлөр ушул эле.
– Чыгармачылык менен алек болуп окууда чайналып калган жоксуӊбу?
– Окууга тапшырарда элчи же финансист болууну каалагам. Анан байкемдин кеӊеши менен финансы факультетинде окууну чечкен элем. Кийинчерээк тасмага тартылып баштадым. Чыгармачылыктын эсеп-кысапка жакындыгы жок эмеспи. Бирок мага эки тарап теӊ жакын. Өзүмдүн жан дүйнөмө жаккан чөйрө болгондуктан ортодо чайналып, бир жумушум бүтпөй, экинчисине чуркаган учур мага тескерисинче «кайф» тартуулайт.
– Кино жаатына кантип келгениӊ эсиӊдеби?
– Аны кантип унутайын? «Сүйөм дечи» тасмасынын тандоосунан өттүӊүз» деп мага коӊгуроо кылышты. Кантсе да чыгармачылыкка аралашып жатам да, агам Ринат бир аз кооптонду. Анан «мени менен барып режиссёрлор менен таанышып келиӊиз» дегем. Ошентип ал тасма талаасындагылар менен таанышып, мени өз колу менен режиссёрго тапшырып келген. Агам мага сынын же мактоосун ачык айтпайт, бирок мен катышкан тасма жарык көргөндө ичинен сыймыктанса керек деп ойлоп коём.
– Байкем деп калдыӊ, үй-бүлөӊ тууралуу кененирээк айта кетсеӊ...
– Үй-бүлөдө 2 бир туугандын кичүүсүмүн. Экөөбүздү апам жалгыз тарбиялап өстүрдү. Атам 7 жашымда каза болуп калган. Андан бери канча жыл өтсө да, апам башка турмуш куруу тууралуу такыр ойлонгон жок. Балдарымды татыктуу адам кылсам деп эле турат. Агам экөөбүз «жакшы адамга турмушка чыгыӊыз» деп көп эле жолу айттык, бирок көнгөн жок. Ага кандай белек бербейли, канча ирет ыраазычылыгына татыбайлы, эч качан ак сүтүн актай албайбыз. Себеби ал бизге бардык өмүрүн арнап койду.
– Апаӊ экөөӊөр өзгөчө жакын болсоӊор керек?
– Өтө жакынбыз. Досторумдун баары апамды аябай жакшы көрүшөт. Менин электрондук дарегиме тасманын сценарийи келгенден тартып мени менен кошо окуп чыгат, тасмага даярдайт, образга кирет. «Жакшы аткар, сага ушунча адам ишенип тапшырып жатат, алардын ишеничин акта» дей берет. Кээде жан дүйнөм тарып, баарынан тажап турганымда башымдан сылап, «Кызым, азыр 20 жаштагы кыздардын эч нерсеге жетишпей жүргөндөрү канча? Сендей болуп тасмага тартылуу алардын тилеги. А сенде мунун баары бар. Жакындарыӊ аман-эсен, эч качан маанайыӊды түшүрбө» деп койсо кадимкидей канат байлап калам.
– Апаӊ менен жигиттер тууралуу сүйлөшөсүӊөрбү?
– Менин жашоомдо жигит менен мамиле куруу деген жок экенин жакындарым билишет. Ар бир кыз кыялкеч келет эмеспи. Жомоктогу ханзааданы арзуу кылып күтөт. Бирок мага ак боз ат минген жигиттин кереги жок, ашынган бай адамды деле күтпөйм. Болгону эркек деген аты эле эмес, ошол атка жооп берчү тарбиясы, жүрүм-туруму, сөзгө бекемдиги болсо мага ошол эле жетиштүү. Эжелерим «жашооӊ сүйүү жаатында тынч болуп турганы жакшылыкка» деп айтып калышат. Себеби көпкө күткөн адам мыктысына учурайт деп айтышат. Азыр мен бактылуумун деп айта алам. Каалагандай билим алып жатам, жан дүйнөмө жакын чыгармачылык менен алектенем. Болгону жүрөгүмдүн ээсин табуу калды өӊдөнөт.
– Буга чейин сүйүү сезими болду беле?
– Мектепте жактыруу сезими болгон. Бирок жан дүйнөм менен берилип, «ушул жигит менен келечегим бир болсо экен» дегендей болгон эмес. Эгерде сүйүүгө учурасам, дароо апама айтсам керек.
– Сүйүүдө же жашоодо адамдардан көӊүл калуу деген болду беле?
– Бул менин жүрөгүмдү ооруткан суроо. Жаш болгонума карабай көӊүл калуулар көп болду. Кыйын күндө колдоп, ыйласа кошо ыйлап, жардамымды аябай мамиле жасаган кээ бир адамдар эшеги ылайдан өткөн соӊ тескери карап басып кетишкен. Ал адамдарга экинчи жолукпаганга аракеттенем, бирок кокустан кезигип калсак саламдашып, саламын алик алып коём. Кээ бир адамдар «бул жумуш сенин колуӊдан келбейт» деп шагымды сындырууга аракеттенишкен. Бирок көпчүлүккө күчтүү адам экенимди далилдедим.
– Күчтүү кыздын дагы кандай сапаттары бар?
– Жашоого дайыма реалдуу көз карашта карайм. Көк бет, кекчил эмесмин. Аябай эмгекчилмин. Кыялданып «алма быш, оозума түш» деп отурбай, дайыма максаттарыма умтулуп жетүүгө аракеттенем. Курбуларымдын арасында «психолог» деген атка конгом. Дайыма угуп, жардам берип, жакшы сөз менен жоошутууга даярмын. Жаман сапатым – адамдарга бат эле байланып калам. Көӊүлүмдү оорутуп кетсе аябай кыйналам.
– Кино сенин жашооӊдо башкы орунду ээлейт көрүнөт. Тасма тартуу учурунда кызыктуу окуялар көп эле болсо керек.
– «Кекеч» тасмасы тартылып жаткан кез болчу. «Эртеӊ туулган күнүм эле, коё бергилечи» десем, «алдын ала айтып коюш керек болчу» деп жумуштан бошотпой коюшту. Ыйлагым келип «20 жашка толуп жатсам» деп ичимден ызалангам. Анын үстүнө апам да сыркоолоп, аны да катуу ойлоп жүрдүм эле. Туулган күнүм күнү тапшырган анализдеринин жыйынтыгы чыкмак, ал күнү жанында болгум келген да. Үйгө барып туулган күндү да унуттум, эртеӊ эрте туруш керек деп уктап калгам. Түнкү саат 12де курбуларым сюрприз жасап туулган күнүм менен куттуктап келишиптир. Толкунданып «ии, жакшы башталды го» деп койгом. Эртеси тартуучу жайга барсам ал жерде да сюрприз даярдашыптыр, үйгө келсем апамдын анализдери да жакшы чыгыптыр. Орусиядагы бөлөм көптөн бери уул күтүп жүргөн, ал чалып «уулдуу болдум» деп жатпайбы. Айтор, ошол күнү кубанычтар көп болду. Бул тасма талаасында болбосо да, тасма тартуу учурундагы сонун окуя болгон.
– Карьераӊдын эӊ сонун жыйынтыгы сен үчүн кандай болушу керек?
– Мен тарыхый тасмада роль жаратууну тилек кылам. Андан ашыгына умтулбайм. Себеби аялзатынын негизги милдети – бактылуу үй-бүлө куруу деп билем.
– Демек, турмуш курган соӊ актрисалыкты таштайсыӊбы?
– Талантымды бекитип жерге көмбөйм. Бирок турмушумдун кандай болору али белгисиз да. Буюрганы болор деп айтам. Эгер жолдошум менден чыгармачылыктан алыстоону талап кылса, балким, алыстайм.
– Маегиӊе рахмат! Кыялдарыӊдын орундалышын каалайм.

Нуркыз Курманбек кызы
Адилет Бектуров
star@super.kg