Элдин маанайын көтөрүп, күлкү тартуулап келген «Тамашоунун» жигиттери жаштарга үлгү болууда. Дегеним, жаш туруп той алып барып, кино тартып, киного тартылып, айтор, жакшы эмгектерди жаратып келишет. Алардын бири – «Ак-Өргө City» командасынын оюнчусу Кубанычбек Курманбеков биздин мейман төрдө.

– Кубаныч, акыркы кезде тасма айдыӊына ыктап жаткандайсыӊ...
– Туура айтасыз, кинодо роль жараткандан сырткары «Султан Сулайман» тасмасында өзүмдү режиссёр катары сынап көрдүм. Ошондой эле биздин команда «Браво», «Пентхаус», «Гонщик таксист» тасмаларынын сценарийлерин жаздык. Учурда Эрнест Абдыжапаровдун уулу Санжар менен иштешели деп турабыз. Кино тармагын өнүктүрүп, чет өлкөлөргө чыгалы деген пландар бар.
– «Браво» фильминен кийин элдин баары «Кү-үн ысыккы» деп ырдап калышты окшойт?
– Негизи, «Күн ысык» деген ыр сценарийде жок болчу. Мурда ушинтип ырдай берчүмүн. Кинонун 4-5 жеринде жөн эле ырдап койгом, анан монтаждап жатып кино тартуучу топ кошуп коюшту. Ал эми кинону 25 күндө тартып, экранга чыгарганбыз.
– Кино тарткандан сырткары дагы эмне менен алексиӊ?
– Биз дайыма команда менен чогуу иштейбиз. Тойлорду алып барабыз, видеороликтерди, жарнамаларды жасайбыз дегендей. Азамат Исмаилов менен жаӊы долбоордун үстүндө иштеп жатабыз. Кыргызстанда боло элек «Comedy Club» сыяктуу теледолбоор. Жаӊы стилдеги жаӊы тамашалар.
– Кичинеӊден эле тамашага жакын белеӊ, дегеле чыгармачылыкка ыктап калганыӊдын себеби эмнеде?
– Биздин командадагы Рүстөм, Зияш үчөөбүз кошунабыз, классташпыз. Кичинекей кезибизде кошуна балдар чогулуп алып 10 сомдон ата-энелерибизге концерт койчубуз. Ошол кадам мени сахнага алып келди окшойт. Атам, байкем, туугандарыбыздын баары тамашакөй, алар тамашалаганда мен бул жакта эле калам. Андан сырткары кичинекей кезимде мектепте футбол ойноп, Рүстөм экөөбүз Казакстанга чейин барып келгенбиз. Бийге катышып, кыргыз бийин бийлечүмүн. 4-классымда КТРКдагы «Шайыр окуучулар клубу» деген көрсөтүүгө бийлеп чыккам. Үйдөгүлөр «биздин балабыз телевизорго чыкты» деп аябай майрамдашкан эле. Андан кийин «Тамашоудо» ойноп, канча жолу эфирге чыгып жатам, анчалык сүйүнүп майрамдашкан жок. Өтө уялчаакмын, гастролдо «Күн ысыккыны» ырда» деп эл абдан суранды. Уялганымдан ырдай алган жокмун. Ошентсе да даярданып, тамашалуу ырларды жаратып ырдап чыксамбы деп ойлоп калдым.
– Бизге берген мурдагы маектериӊде «президент болом, болбоду дегенде борбор шаарыбыздын мэри болом» деген экенсиӊ?
– Жок, саясатка аралашкым келбейт. Мен саясатчы болсом, Кыргызстан бат эле оӊолуп кетет го (күлүп). Ал жакка көп убакыт керек, жан дүйнөӊдү, өзүӊдү бүтүн арноо зарыл. Азыр мен көӊүлүмдү киного арнап койгом.
– Өзүӊ кайсы кесиптин ээси болосуӊ?
– Мен Кыргыз-Орус Славян университетинде архитектор адистиги боюнча бүтүрүү курсунда окуп жатам. Буюрса, быйыл диплом алам, анан кинорежиссёрлукка тапшырам. Кыргызстандагы мыкты режиссёр болоюн деп жатам. Архитектор да өтө кызыктуу кесип. Атам сүрөттү жакшы тартат, мен да ал жагынан таланттуумун. Шаардагы көп кабаттуу үйлөрдүн долбоорлорун чийип, макеттерин жасап кыялдана берем.
– Жакшы экен, демек, атаӊ таланттуу адам экен да?
– Атам сүрөтчү, кол өнөрчүлүк менен алектенет. Тактап айтканда, кыргыздын оюулары түшүрүлгөн баштык, көөкөр, чанач, ээр токум, ат жабдыктарын, айтор, кыргызга тиешелүү буюмдардын баарын жасайт. Ал эми апам карышкырдын терисинен ичик тигет. Иним болсо зергер, сөйкө-шакек жасайт, ээр токумду кооздойт. Кардарлар Орусиядан, Казакстандан бири-биринен угуп, өздөрү келип буйрутма беришет. Өмүрбек Бабановдун күлүгүнө ат жабдыктарды, ошондой эле Орусиянын кино тармагында иштегендерге да керектүү кийим-кече даярдап беришкен. Мен төрөлө электе «Чыӊгыз хан» киносун тартабыз» деп Италиядан режиссёрлор келип, баатырдын кийимин тиктиришкен экен.
– Ачык, тамашакөй кыздар жагат дейсиӊ, өзүӊө жакпаган мүнөзүӊ барбы?
– Мен өтө шашмамын. Сүйлөгөндө да шашып сүйлөйм. Бул адат менен кичине кезимден бери күрөшүп келе жатам, бирок жеӊе элекмин. Кичине кезимде апам «Ош базарына» майда-чүйдөгө жиберсе, шашып кийинип кетип калчумун. Базарга келип алып эмнеге жиберди эле деп такыр эстей албайм. Көрсө, шашып, эмне алыш керек экенин сурабай келе бериптирмин. Үйгө барып, бир сыйра уруш жеп, анан кайра базарга келчүмүн. Бир нерсе сатып алсам да акчасын төлөп, алган буюмумду унутуп кетип кала берем.

Замира Рахманбердиева
star@super.kg