«Салам, Нью-Йорк!» тасмасы жарык көрөрү менен, андагы Баатырдын образын жараткан актёр Бектемир Мамаюсуповго ашык болгон кыздардын саны арбый баштаган. Актёр «тасмада жакшы адаммын, бирок жашоодо андай эмес» деп тамашалап калат. Көптөгөн кыздардын жүрөгүн ээлеген жигит 30-апрель күнү сүйүктүүсүнө баш кошту. Кеп ошол тууралуу болсун.

– Саламатсызбы, Бектемир? Куш бооӊуз бек болсун! Жакында эле жолукканыбызда үйлөнүү бул жакта турсун, «сүйүктүүм жок» деп жаттыӊыз эле...
– Саламатчылык, анда үйлөнөрүмдүн дайыны жок болчу да (күлүп). Мен дайыма «эгерде сүйүүгө кабылбасам, 50 жашка чыккыча үйлөнбөй жүрө берем» деп айтып жүрчүмүн. Буйрук экен, ушул жылга туш келиптир, 29 жаштамын, жаш эмесмин дегендей. Келинчегимдин аты Мунара, менден 4 жаш кичүү. Кесиби боюнча финансист. Экөөбүз алыс туугандардан болуп кетебиз. Кичинесинен бери тааныйм, бирок акыркы он жылдан бери көрө элек болчумун. Мектепти аяктаган соӊ Лондонго окууга кеткен. Бир ай мурун Кыргызстанга эс алууга келген. Ошондо экөөбүз жолуктук, бир көрүп сүйүшүп калдык. Анан ошол эле күнү үйлөнөлү деп чечтик. Кайра Англияга кетмек, бирок мен алып калдым.
– Апаӊыз экөөӊүздөр турчу элеӊиздер, бүлөгө баш кошулуп сүйүнүп жатса керек?
– Ооба, анын кубанычында чек жок, айланып-кагылып «кызым» деп эле басып жүрөт.
– Үй-бүлөлүк жашоо бойдокчулук кезден эмнеси менен айырмаланат экен?
– Мурдагыдай чартаӊбай тебүү жок, болгону сүйүктүүм менен чогуу жашап калдым. Албетте, келин болдуӊ деп эле кызмат кылдырып койбойбуз. Өзүм деле тамак жасап, идиш жууп коюшум мүмкүн. Эмнеге сүйүктүүӊө жардамдашканга болбосун?
– Бир көрүп эле үйлөнгүӊүз келген кыз башкалардан эмнеси менен өзгөчөлөнүп турат болду экен?
– Буга чейин мага интернеттен көп эле кыздар жазып жүрүшчү. Жашырбайм, жазса жооп берип, мен деле сүйлөшүп койчумун. Ал кыздарды жаман дебейм, ар бир айым өзүнчө артыкчылыкка ээ. Мен 4 кыздын арасында чоӊойдум, кыздарды сыйлайм. Жубайым экөөбүздүн окшоштук жактарыбыз көп. Ойлогон оюбуз, жашоого болгон көз караштарыбыз дал келет. Ал да мага окшоп чет жерде окуп, иштеп, ал жактын кыйынчылыктарына кабылган. Дүйнө кезүүнү каалайт. Буюрса, чогуу жер шарын кыдырып келүүнү көздөп жатабыз. Албетте, мунун баары бир күндө боло калбайт. Акырындан тарыхта калган атактуу жайларды, табияттын табышмактуу жаратылышын көрүп, эсибизге сактап калсак дейбиз.
– Экөөӊүздөр саякаттап кетип калып, балалуу болууну артка жылдырып жибербейсиздерби?
– Кудай бергендей болот. Ал да 5 бир тууган, мен да 5 бир тууган, чоӊ эле үй-бүлөдөнбүз. Ошондуктан көп балалуу болгубуз келет.
– Сиздин актёрлук кесибиӊиз келинчегиӊизди кооптондурган жокпу? Бирде бар, бирде жок болот дегендей, такай болчу жумуш эмес...
– Тескерисинче, баарына экөөбүз жетебиз. «Кандай жумуш баштаба жардамдашам, жаныӊда болом» деп жатат. Ушунусу мен үчүн өтө маанилүү. Эми мага жардамдашып, мени менен эле чогуу иштейт го. Актёр катары мекениме пайда алып келейин деген таза тилегим бар. Бул кесиптин артынан атактуу болуп, укмуш акча таап жиберейин деген ой келген да эмес.
– Чыгармачылыкка келсек, тасма тартам деп жүрөсүз. Ал жаатта иштер кандай болууда?
– Азыр Эрмек Нурбаев, Улан Барпиев менен чогуу иштешүүнү чечтик. Буюрса, фильмдин бюджети 80 миӊ доллардан 200 миӊ долларга чейин болот деп пландалууда. Жакында Кытай тараптагы демөөрчүлөргө барып сүйлөшүп кайттым, алар азыр бизден тасманын сценарийин күтүп жатышат. Сценарий менен таанышкан соӊ акчаны бөлүп беришет. Ошондуктан биз кытай, казак жана кыргыз улуттарынын ортосундагы биримдик тууралуу, мекенибиздин кооз жаратылышын камтыган сценарий түзүшүбүз керек. Анын үстүнөн иштеп жатабыз. Негизги максат – улуттар аралык биримдикти жана Кыргызстанды чет элдиктерге даӊазалоо. Биздин тасма жарыкка чыкканда туристтердин кызыгуусу артып, балким, биз тарапка тартыла башташат деген үмүт чоӊ.
– Азыр сапатсыз тасмалар толтура, киносынчылар «мунун себеби билимсиз режиссёрлордун көбөйгөндүгүнөн» деп жатышат. Сиз андай сынга кабылуудан коркпойсузбу?
– Жок, себеби жалпы идея меники болгону менен, фильмдин үстүнөн профессионал режиссёр, сценаристтер иштейт да. Мен идеянын автору болуп калам.
– Сиз тууралуу «көп тасмаларга гонорар аз, мен көп алам» деп тартылбай коёт» деп айтышат. Ушул убакка чейин 2 эле тасмага тартылганыӊыздын себеби ушундабы?
– Колдон келсе бекер деле тартылып бере берем. Эми жаш бала эмесмин да. Убакыт деген учкан куштай, өзүмдүн ишке ашырчу пландарым бар дегендей. Татыктуу эмгек акыга тартылсам, мага деле жакшы го. Бирок буга чейин «тартылбайм, аз акча төлөйт экенсиӊ» деген учур болгон эмес.
– Анда ийгилик каалайбыз. Кармашкан колуӊуздар үзүлбөсүн!
– Рахмат.

Нуркыз Курманбек кызы
star@super.kg