«Коомдук транспорттон жакшынакай жигит менен тааныштым. Телефон номерлерибизди алышканбыз. Бүгүн телефон чалып, ролик тепкенге чакырды» деген Жылдыз (жабырлануучунун аты өзгөртүлдү) курбусу менен болгон ушундай маектен кийин көп өтпөй эле зордукчунун курмандыгы болгон. 28-май күнү Бишкек шаарындагы Октябрь РИИБинин нөөмөт бөлүмүнө «Ататүрк» сейил багынан эс алуучулар телефон чалып, бадалдын арасынан башынан оор жаракат алып канжалап, эс-учун билбей бир кыз жаткандыгын билдиришкен.

«РОЛИК ТЕБҮҮЧҮ АЯНТТАРДЫН БААРЫН КЫДЫРЫП ЧЫКТЫК»
Окуя тууралуу зордукчуну колго түшүргөн Октябрь РИИБинин кылмыш иликтөө бөлүмүнүн кызматкери АЗАТ ЖАКЫПОВ айтып берди:
– 28-майда сейил бактан коңгуроо келип түшөрү менен ыкчам топ окуя болгон жерге бардык. Биз барган маалда жабырлануучуну «Тез жардам» кызматы алып кеткени жатыптыр. Бирде эсине келип, кайра эсин жоготуп жатып, Дима деген ысымды атоого жетишти.
Кыздын башы оор нерсе менен ургандан улам жарылып, баш мээси ачылып калыптыр. Бетин таанып болбойт. Жабырлануучунун аты-жөнүн тактап, туугандарын, окуган жерин жана курбуларын аныктадык. Бир курбусу анын жакын арада эле бир жигит менен таанышып, анын чакыруусу менен ролик тепкени шаардагы аянттардын бирине барганын айтты.
Бизде Дима деген ысымдан башка бир да илинчек жок болчу. Бишкектеги ролик тебүү кызматын көрсөткөн бардык жайлардын даректерин алып, кыдыра баштадык. Колубузда жабырлануучунун сүрөтү бар болчу. Ири соода борборлорунун биринде ролик тебүүчү аянтты иштеткендер сүрөттөгү кыздын узун бойлуу жигит менен келип, ролик тээп кеткендигин айтышты. Ыкчам топ окуя катталгандан 5 саат өткөндөн кийин кылмышка шектүүнү өзү иштеген соода борборлордун биринен колго түшүрдүк. Ал соода борборлордун биринде коопсуздук кызматкери болуп иштеп, Кызыл-Аскердеги Месароша көчөсүндө батирде жашап жүргөн. Ыкчам топ шектүүнү колго түшүрүү аракетин көрүп жатсак, соода борбордон кесиптештери чогулуп келип, аны бошотууга аракет жасашты. Кызматтык куралыбыз менен эскертүү иретинде асманга атып, шектүүнү унаага салууга үлгүрдүк. Кылмышка шектүү Абдумуталип Мамажанов 1995-жылы туулган Ош облусунун тургуну экени аныкталды.

«ЖАБЫРЛАНУУЧУ ЭСИН ЖОГОТКОНДО ӨЛДҮ ДЕП КЕТИП КАЛГАН»
Ал жабырлануучуну «Ататүрк» сейил багындагы ээн жерге алып барып зордуктап, каршылык көрсөткөн кызга зомбулук кылган. Бул кылыгы үчүн аны сотко берерин айтканда, кызды чоң таш менен башын жарып, эсин жоготкондо өлдү деп ойлоп кетип калган. Кыздын ошол учурдагы абалын, алган жаракаттарын көрсөңөр, кантип аман калган деп таң калышыңар мүмкүн.
Абдумуталип Мамажанов кызды өлтүрдүм деп ойлоп, анын колундагы «Нокиа» үлгүсүндөгү кымбат баалуу телефонун наушниги менен жана чөнтөгүндө болгон 20 сомун алып кетип калган. Жабырлануучунун уюлдук телефонун колго түшкөнгө чейин колдонуп жүргөндүгү анык болду. Кылмышка шектүү кылган кылмышын толугу менен моюнуна алды. Учурда ал СИЗОдо камакта. Анын үстүнөн Кыргыз Республикасынын Кылмыш жана жаза кодексинин 104 (ден соолукка атайылап оор залал келтирүү), 28-197 (киши өлтүрүүгө аракет кылуу), 129 (зордуктоо) жана 168-беренелери (каракчылык) менен кылмыш иши козголду.

«БЕЙТАПТЫН ТУУГАНДАРЫНА АНЫ САКТАП КАЛАБЫЗ ДЕП СӨЗ БЕРЕ АЛГАН ЭМЕСПИЗ»
Жабырлануучу «Тез жардам» кызматы менен келип түшкөн Бишкек шаардык травматология жана ортопедия илим изилдөө борборунун нейрохирургия бөлүмүнүн башчысы Советбек Сатиев кыздын башын тигип, жасаган операциясы тууралуу айтып берди. Жабырлануучунун жаракат алгандагы сүрөттөрүн көрүп, керемет менен тирүү калган дегенге биз да ишенип, таң калдык.
– 28-майда бейтап «Тез жардам» менен оорукананын жандандыруу бөлүмүнө келип түшкөн. 30-майда биздин бөлүмгө которулду. Анын баш мээсин ачып, мээнин абалын, инфекция кирип кеткен жокпу, зыян тарткан бөлүктөр жокпу деп текшерүү жүргүздүк. Баш сөөктү бириктирип, башын тиккенден кийин сол жак бетинде алакандай жерге эт жетпей калды, башка жери жайында. Бетиндеги эт менен тери жетпей калган жер акырындык менен бүтөт. Жакшысы башка бейтаптардыкындай болуп ириңдеп, сары суу толбой жарааты жакшы айыкты. Кыздын абалы өтө оор болуп келгендиктен, анын туугандарына сактап кала алабыз деп сөз бере алган эмеспиз. Бирок 22 күндөн соң баары жай-жайына келип, 22-июнда үйүнө чыгууга уруксат бердик. Анын биздеги оору тарыхы жазылган китепчесин бүгүн соттук-медициналык экспертизанын кызматкерлери келип алып кетишти. Биз өзүбүзгө тиешелүү милдеттерибизди аткардык. Бейтап Бишкектеги жогорку окуу жайлардын биринде 3-курста окуйт экен. Дареги боюнча медициналык көзөмөл жүргүзүп туруу үчүн жашаган жерин сураганыбызда, окуу жайдын жатаканасында жашаарын айтты. Бирок ата-энеси жатаканадан алып кетебиз, батирге чыгабыз деп билдиришти. Дареги дайын болсо 2 айдан кийин кайталап кароо жүргүзүүгө алабыз.
Жабырлануучу 22 жашта. Кылмыш иликтөө тобунун кызматкерлери иликтөө иштери үчүн ага суроолорду берүүгө барган учурда абдан коркуп, кылмышкерди коё бербегиле деп суранганын айтышты. Жогорудагы окуядан кийин бейтааныш адамдар менен жакындан билбей туруп, мамиле курууда абайлагыла деп эскерте кетмекчибиз.

Гүлжан Асанкожоева
koom@super.kg