Аста-пыр-алла!

“Супер-2009” тандоосу 22-декабрда жыйынтыкталганы эсиңизде болсо керек? Мына ошондо талапкерлер арасында көмүскө да, көрүнөө да салгылаштар болуп өттү. Кайсы бир ырчы келип өзүнө добуш кошуп коюубузду суранып, биздин кызматкерлерге акча сунуштаганы да бар. Ким экенин изилдесек аты-жөнү такталат деңизчи, бирок добуштарды акчага сатып алуу эч мүмкүн эмес эле. Бул эми өткөн иш. А биз кеп нугун башкага бурабыз.
“Адам адамга ишенет” деп айтылып жүргөн сөз кашкайган чындык. Гезитибизде “Жылдыздын үйүндө конокто” деген рубрика бар эмеспи. Ырчы Жанета Бобкованы гезитибиздин өткөн сандарынын биринде ушул рубриканын коногу кылалы деп пландаганбыз. Ырчы биздин сунушубузду кабыл алып, “жакында эле курдук” деп заңгыраган эки кабаттуу үйүнө чакырган. Ал гана эмес, жыгачтан оюлган тепкичин “Денис өз колу менен жасады” деп таң калтырган. “Денис кандай азамат! Ырдайт, каражат табуучу дагы бир топ иштери бар, жадакалса колунан көөрү төгүлгөн уста да турбайбы!” деп ыраазы болуп жатканбыз. Белгилүү ырчы айтып жаткан соң конокко барганда, ырчы айымдан үйдүн документин суроону туура көргөн эмес элек. Бирок материал жарык көргөн соң окурмандардан коңгуроо кагыла баштады. Бир окурман телефон аркылуу “гезитке чыккан Жанетанын үйү эмес, мен анын үйүн билем” деп узун сабак кеп баштады. "Көрө албаган эле бирөө айтып жатса керек" дегичекти, дагы бирөө чалып: “Жанета менин кошунам, сиздер чыгарган үй ырчыныкы эмес”,- дейт. Буга чейин мындайга туш келбеген жаныбыз, кандай кыларды билбей, ырчыны редакцияга чакырдык. "Аттуу-баштуу эле ырчы, анан кантип бизди, бизге кошо элди алдасын?" деп ойлодук. Бирок Жанета айым: “Ал үй меники эмес экени чын. Гезитке чыгат дегенинен, туугандардыкына барып тарттырып койгом”,- деп жатпайбы!
Жанетага окшогон белгилүүлөр айтса, калп айтпайт деп ишене берген бизде да күнөө бар. Бул окуядан кийин гезиттердин бири “Жанета Испанияга барган эмес” деген өңүттө жазып чыкканы да чын го деп бүшүркөй түштүк. “Bon Voyage” Эл аралык сынагында биринчи орунду жеңген Жанета Бобкова” деп дүйнөлүк интернет булактарына суроо салсак, жергиликтүү сайттардан башка бир дагы булак жооп берген жок. Айрым сайттарда “Bon Voyage” Эл аралык балдар фестивалы деп чыкты.
Бирок Жанетанын ыйманы бар экен. ЭлТР коомдук телеканалында түз эфирде “Супер-Инфого” мен жөнүндө жазылган маалыматтардын 80 пайызы калп” деп моюнга алды. Ошондон улам Барселона шаарында сынак өткөнүнө да, өтсө чын эле биринчи орунга татыганына да ишенүү кыйын экен деген ойго такалдык.

star@super.kg