Учурда Германияда жашап, Берлиндеги симфониялык оркестрде иштеген мекендешибиз, скрипкачы Вера Осмонкулова (ырчы Ырыскелди Осмонкуловдун эжеси) социалдык тармактагы жеке баракчасына мушкер Алмазбек Раимкулов тууралуу көпчүлүктү таӊ калтырган маалымат жарыялады. Эске салсак, белгилүү мушкер теле алпаруучу Ассоль Молдокматова менен ажырашкандан кийин дал ушул музыкант айым менен сүйүү мамилесин курган эле. Вера айым Алмазбек мырзанын биз билбеген жоруктарын баяндаган жеке баракчасындагы билдирүүлөрүн өзгөртүүсүз беребиз.

«АЛМАЗБЕКТИН КАРЫЗЫН КЕЧТИМ. АМАН БОЛСУН!»

1. – Кыргызстандан ыпысык жаӊылык... Белгилүү кыргызстандык мушкер Алмазбек Раимкуловдун бир тууган карындашы Элмира Раимкулова 40 жаштагы байкесинин алдамчылыгы жана менин үй-бүлөмө финансы жактан ыӊгайсыз абал түзгөндүгү үчүн кечирим сурады. Мушкердин психикалык оорудан жабыр тартарын эске алып, Вера Осмонкулова кечиримди кабыл алат. Дегеним, мындай финансылык кылмыш жасап, алдамчылык менен алектенип жүргөндө Алмазбек Раимкулов психикалык жактан ооруп жүргөн имиш. P.S. Кыскача маалымат: Учурда Раимкулов дин жолуна түшүп, 5 маал намаз окуп, мурунку досторунан жана айрым туугандарынан да баш тартыптыр. Пландарында молдо болуу ниети бар экен. Алмазбек, туура жолго түшөйүн дегениӊиз жаман эмес. Эгерде мээнетиӊиз таза болсо, Кудай жолуна келесиз. Эгер жеӊил акча үчүн бардык ыйык нерселерди аттап өтүүгө даяр болгон жоругуӊуз кала берсе, анда аман эле болуӊуз!
2. – Кыргызстандан дагы бир ысык жаӊылык... Кыргызстандык спортчу мырзаларга алдыӊкы беш жылда чет өлкөгө чыгууга мамлекет виза бербейт имиш. Мына, Алмазбек Раимкуловдун күлкүлүү шылтоолору.
3. – Кыргызстандан түз жаӊылыктар... Алмазбектин туугандары мени кат аркылуу коркутушууда. Эгер андан карызымды доолаганды токтотпосом, ал өзүнүн спортчу жигиттерин чогултуп келип көзүмдү тазалайт экен. Анын апасы мага «картайып алжып калган неме, сени өзүм адам жалдап түбүӊө жетем!» деди. Жазгыла журналисттер, жазгыла, Кыргызстанда криминал менен ким алектенерин эми билебиз.
4. – Кыргызстандан түз жаӊылыктар... Мага Алмазбек Раимкуловдун да, анын спортчуларынын да колу тие албайт. Анткени мен Германиянын жаранымын. Бир коӊгуроо менен Алмазбекти, анын спортчуларын кошуп, өмүр бою абакта отургузуп коё алам. Германиянын полициясы бул окуя боюнча кабардар.

«ҮЙЛӨНҮП УШАКТАРГА ЧЕКИТ КОЙСОМ ОКШОЙТ»
Аталган окуянын чоо-жайын билүү максатында Алмазбек Раимкуловго байланышканыбызда: «Тобо, качан мени бул аялдар жайыма коюшат? Мени капчык кылып алышты го, бер дегенден башканы билишпейт. Мен ага жакшы сүйлөп, сылык мамиле кылганым үчүн карыз кылып койдубу? Жаман мамиле кылсаӊ «грубиян» дешсе, мен эмне кылышым керек? Мен андан карыз алган эмесмин, эмнени айтып жатканын түшүнбөдүм. Мени Альфонс, Ромео кылып жиберишти. Тезирээк үйлөнүп, ушактардан кутулбасам болбой калды. Ата-энем 11 жылдан бери Америкада жашап, мына бүгүн аларды аэропорттон тосуп алдым. Алар да «үйлөн» деп жатышат. Бирок азыркы кыздар акчаӊды эле карап калышыптыр, чет өлкөлүк кызга эле үйлөнсөм окшойт. Ал эми дин жолуна түшкөнүмө көп болду. Бул жаӊылык деле эмес. Учурда Кыргызстандын жаш спортчуларын колдоп, өзүм да спортко кайтып келгени жатам. Мени ушундай интригага аралаштырбай эле коюшса жакшы болот эле»,- деп билдирди.

Лунара Бекиева
star@super.kg