Айпери Кубик кызы 5-августта көз жарып, тун наристесин жарыкка алып келди. Жолдошу Наруланга балканактай уул төрөп, куудул Кубик Калыковду таята статусуна ээ кылган ырчы айымды кепке тарттык.

– Куттуктайбыз, бешик боо бек болсун! Биринчи жолу эне болуп жатасың, кандай сезимдерге курчалдың?
– Азыр мен кандай сезимдерге балкып турганымды сөз менен жеткире албайм. Баламдын кичинекей жүзүн, колу-бутун карап алып эле эт жүрөгүм элжиреп жатат. Мындай бакытты баарына каалар элем.
– Боюңда барда эле уул экенин билчү белең?
– Ооба. Атайын УЗИге түшпөсөм да негедир жүрөгүм сезип турчу.
– Кош бойлуу кез кандай өттү?
– Ай-күнүм жеткиче эле концерттерде, гастролдо жүрдүм. Кайсы бир тамакка талгак болуу менде болбоду.
– Атын ким койдуңар?
– Азыр уулума ысым ыйгара элекпиз. Үйгө чыкканда чоң ата, чоң энеси коюшат.
– Бала ыйлаак эмеспи?
– Балам бир аз чыр экен. Колума алып жүрүп селки кылып алат окшойм. Бирок кыйналган жокмун.
– Рахмат, уулуңа узун өмүр каалайбыз.

star@super.kg