КЕСИП ЖААТЫНДА
Копирайтер (copywriter) – англис тилинен которсок «copy» – кол жазма жана текст, «write» – жазуу дегенди түшүндүрөт. Бул жарнама жана презентация тексттерин жазуу боюнча адистештирилген копирайтинг ишмердиги менен алектенген адам. Башкача айтканда, кайсы бир товарды, адамды, компанияны популярдуу кылуу максатында айтылган же жазылган тексттерди копирайтинг дейбиз. Ал эми андай тексттерди ойлоп тапкан, копирайтинг менен алектенген адамды копирайтер деп аташат. Бирок мезгил өткөн сайын интернет ааламы кеӊейип, копирайтерлер бир аз башка өӊүттө да иш алып бара башташты. Тактап айтканда, учурдагы копирайтерлердин көпчүлүгү кызыктуу мазмундагы тексттерди жазып, аны ар кандай интернет сайттарына сатышат. Кыскасы, сен кызыктуу текст жазсаӊ, эгер ал текстти сенден сатып алышса, демек, сен копирайтерсиӊ.

ЖАӉЫ ТЕХНОЛОГИЯДА
Гоупро (GоPro) – бул «GoPro, Inc.» компаниясына таандык соода маркасы. Бул логотиптин алдында активдүү спорт жана күнүмдүк жашоону тасмага түшүрүүгө ылайыкталган экшн-камера жана ага керектелүүчү каражаттар чыгарылат. Сиз да көрүп калсаӊыз керек, мотоцикл айдаган байкерлердин же велосипед сүйүүчүлөрдүн башына кийилүүчү каскасында кичинекей камера турат. Мына ушул камералар соода маркасынын аталышы менен гоупро деп аталат. Учурда гоупро тасма тартууну мыкты билген адистер арасында же жөн эле өз жашоосун ар кандай ракурстан тартканды жакшы көргөн катардагы адамдардын арасында абдан популярдуу. Баса, бул кичинекей камераларды жаныбарга да чаптап коюп, алардын жашоосуна көз салуу үчүн пайдаланып келишет.

АШКАНАДА
Смузи – бул быйылкы жайда популярдуу болуп жаткан коюу суусундук. Англис тилинен которгондо «smooth» – жумшак, жылмакай, жагымдуу деген маанини берет. Миксер же блендер менен сабиз, малина өӊдүү жемиштерди сүткө же ширелерге кошуу менен жасалат. Адатта смузи вегетариан ашканасында көп колдонулат. Дени сак жашоо образын жүргүзгөн адамдар, ошол эле спортчулар арасында смузи эӊ керектүү суусундуктардын бири.
1930-жылдары смузи алгач Калифорния штатында сатыла баштап, 2000-жылдарда гана эл арасында бул суусундук көп ичиле баштаган. Смузини алгач ким ойлоп тапканы белгисиз. Айрымдар Тынч океанда сёрфинг спорту менен алектенген адамдар биринчи болуп смузи ичип башташкан деп айтышат.

Мирлан Өмүралиев
koom@super.kg