Жылдыздар турмушунан

Эсиңизде болсо, өткөн санда “Жанета калп айтабы же “Супер-Инфобу?” деген аталышта макала жарыялаганбыз. Ал материалдан “Жанета атын таанытуу үчүн баарына даярбы?” деп биринчи бетке анонс берген элек. Албетте, ал суроо макаланын өзүндө кенен чечмеленип берилген.
Гезит чыккан күнү эртең менен Юрий Бобков келини Жанетаны, уулу Денисти ээрчитип редакциябызга келди. Кыргызга таанымал, Эл артисти наамынын ээси Юрий Бобковду, албетте, сыйлайбыз. Эл артисти бул – элдик адам. Кырк жылдык өмүрүн элге арнап келе жаткан Эл артисти: “Мен жаңжалды жактырбаган адаммын. Бирок үй-бүлөм тууралуу кеп болсо, унчукпай коё албайм. Силер кызыксыңар, «Жанета өзүн таанытуу үчүн...» деп. Биринчиден, ал он жылдан берки үзүрлүү эмгегинин натыйжасында эл аралык сынактардын эки жолку жеңүүчүсү болду. Анан ким тааныбасын? Экинчиден, «баарына даярбы?» дегениңер менин үй-бүлөмө чоң шек келтирди. Жанетанын талантын мен гана эмес, профессионал ырчылар да баалашат. Ушундай таланттуу ырчы Испанияда кыргыздын желегин желбиретип келсе, силер шек санайсыңар. Менин оюмча, шоу-бизнес менен иштеген гезит кыргыз эстрадасына көмөк көрсөтүүсү зарыл”,- деп күйүп-бышты.
Бир эмес, бир нече ирет редакцияга келип, тынчсызданган Юрий байкенин үй-бүлө дегенде үстөмөндөн түшөрүн байкадык.
Биз макалабызда “Жанета Испаниядан биринчиликти алып келгени калп” деп айткан эмеспиз. Эл ичиндеги ар кандай кептерден улам дүйнөлүк интернет булактарынан “Bon Voyage” – Эл аралык сынагы, Жанета Бобкова деп суроо салып, жергиликтүү сайттардан тышкары жооп ала албадык» деп жазганбыз. Ырчыга дал ушул шектенүү катуу тийиптир. Ырчы Испанияга кайрадан суроо салып тастыктамакчы болгон, анан “аныктамасы бир жумадан кийин келет экен” деди. Бирок Жанета бизге сынактан алган дипломун көрсөттү. Эмнеси болсо да, ортодогу түшүнбөстүктөрдүн баары артта калды.