Былтыр ырчы Сайкал Садыбакасова Ош мамлекеттик юридикалык институтунун сот-прокуратура факультетин аяктаган эле. Сайкалдан кандай прокурор же сот чыгат деп күтүп жатканда ырчы Б.Бейшеналиева атындагы Кыргыз мамлекеттик маданият жана искусство университетинин телекөрсөтүү жана радиоуктуруу режиссёрлугу бөлүмүнө тапшырганын кабарлады. Айтымында, окууга кабыл алып жаткан комиссия жогорку билимин, жөндөмүн эске алып, 2-курска кабыл алышкан. «Өзүм пианинодо ойнойм, вокал жагынан да Кудайга шүгүр, жакшы эле билимим бар. Клип тартып, сценарий жазууга кызыгып жүргөм. Ошондуктан ушул бөлүмдү тандадым, келечекте мыкты кинолорду тарткым келет. Сырттан окуу бөлүмү болбогондуктан жакшылап окуп, «Кыз-Бурактын» да иштерине жетишишим керек. Андыктан азырынча турмушка чыгууну пландай элекмин»,- дейт Сайкал.