Москвада өзүн «патриот» атап, «башка улуттун өкүлү менен жүрдүӊ» деп күнөөлөп кыргыз кыздарын кордоп жүргөндөрдүн бири «20 жаштагы кызды зордуктады» деген шек менен кармалды. Бул тууралуу Кыргызстандын Орусиядагы элчилиги кабарлады. Маалыматка ылайык, полиция кызматкерлерине 20 жаштагы кыз Майрамбек аттуу тааныш жигити аны коркутуу жана күч колдонуу менен зордуктап видеого тартып алып, өзү «патриоттордун» мүчөсү экендигин жана полицияга кайрылса тасманы интернетке жайып жиберерин айтып опузалагандыгын билдирген.
Полиция кызматкерлери кылмышка шектүү катары Ош облусунун Өзгөн районунун 1987-жылы туулган тургунун кармашты. Суракта ал 2 ай мурун Москвага келгенин айтып берди. «Ал кыз менен Москвадагы бир ишканада иштегенбиз. Жүк ташуучу болуп иштечүмүн, ал кызга да жардам берип жүргөм. Жакшы мамиледе болчубуз. Ортобузда жыныстык катнаш болгон. Бир жолу ага «өзбектер менен байланышып мени тоготпой калдыӊ» деп катуу сөз айтып койгом. Аны урган эмесмин, чачынан кармагам»,- деп көрсөтмө берген. Бул факт боюнча Орусиянын Кылмыш-жаза кодексинин «жабырлануучунун алсыз абалынан пайдаланып коркутуу жолу же күч колдонуп зордуктоо» беренесинин негизинде кылмыш иши козголду. Учурда тергөө жүрүп жатат.

Мирлан Өмүралиев
politika@super.kg