Учурдун эӊ популярдуу ырчысы Нурлан Насип сахнага кадам таштагандан бери ырчынын күйөрмандары көбөйүп, бир топ тепкич бийик көтөрүлдү. Жылдызы жанып турган Нурлан менен атактуулук, жашоосундагы жаӊылык, саясат, жеке жашоосу тууралуу маек курдук.

– Нурлан, саламатсыӊбы? Учурда үгүт иштери менен жүрөсүӊ. Кайсы партияга ырдаарыӊды төлөгөн гонорарына карап тандадыӊбы же саясий көз карашыӊдан уламбы?
– Саламатчылык! Саясат айдыӊында орчундуу жаӊылыктар болуп калганда эле кулак төшөп калбасам, бул чөйрөгө кызыкчу эмесмин. Азыр эки тарап теӊ капа болбой турган гонорарга келишим түзүп ырдап жатам. Кайсы партия өтсө да, өлкөбүздү өнүктүргөнү бийликке келсе дейт элем. Анткени биз көп жактан арттабыз.
– Үгүт иштеринен эӊ көп гонорар алгандардын сап башында экениӊди кулагыбыз чалды эле. Сыр болбосо канча алдыӊ?
– Сумманы элге жарыя кылуунун кажети жок деп ойлойм. Өзүӊүздөр билгендей, «Жылдын супер ырчы мырзасы» наамын 3 жолу алгам. Ушул наамды алгандан кийин алдыӊкы ырчылардын бири катары өзүмдүн ставкамды койгонго укугум бар. Анын үстүнө буга чейин тытынып иштедим, ошол эмгегим жемишин эми берип жаткан кез. Быйылкы шайлоодо талашка түштүм, көптөгөн партиялардан чакыруулар болду.
– Тапкан каражатыӊды каякка жумшайсыӊ?
– Албетте, бул акча жакшы жакка жумшалат. Келечегимди ойлоп, үй же жер алганга аракет кылам. Колумдан келишинче туугандарыма жардам берем. Байкелерим убагында жардам беришкен, алардын жеке бизнестерин алдыга жылдырууга салымымды кошом.
– Саясатчы болгуӊ келеби?
– Мен ырдап жаткан партия «сендей эл адамы болгон жигиттер керек» деп катарына кошулуумду сунушташты. Алгач ата-энем менен кеӊештим, алар колдоорун айтышты. Бирок ойлонуп көрүп, бул нерседен баш тарттым. Мен азырынча саясатка барууга даяр эмесмин. Анын өзүнүн убагы келер, ошондо көрө жатарбыз. Үгүт иштеринде ырдап жүрүп оюм кадимкидей өзгөрдү. Мурда ырчы болом деп келсем, азыр саясатка кызыга баштадым. Буюрса, бышып, даяр болгонумда саясатка кадам таштайм.
– Саясатчы болсоӊ, алгач кайсы көйгөйлөрдү чече баштамаксыӊ?
– Алгач Токтогул жергесинен баштамакмын. Анткени ал жакта жолдор начар, маданият артта калган. Өз жеримдин артта калган тармактарын жакшыртмакмын. Өзүнчө саясатчы болуп кеттим го, ээ? (күлүп). Учурда Кыргызстанды алдыга жылдырууга жан үрөп иштеп жүргөн жаштар бар. Убагы келгенде мен дагы ошолордой болсом жаман болбос. Бирок бир жаман жери – саясатта атыӊ бул­ганып калышы мүмкүн. «Жаман атты жуусаӊ да, куусаӊ да кет­пейт» дегендей, жаманатты бо­луп калуудан корком.
– Азыр популярдуулуктун туу чокусунда турасыӊ. Ага манчыркап кетпей элесиӊби?
– Жок, мен ар бир күнүмө шүгүр кылып жашайм. Кээ бир досторум «сенин ордуӊда болсок, учуп кетмек болушубуз керек» деп калышат. Мен алардан «ушунчалык популярдуумунбу?» деп сурайм. Чынын айтсам, азыркыга чейин өзүмдүн канчалык популярдуу экенимди билбейм. Атактуу экеним элдин алдына чыкканда гана сезилет.
Жакында концерттен соӊ унаада кетип баратсам кыздардын баары «Нурлан Насип!» деп кыйкырып жатышканда жан дүйнөм башкача болду. Алардын сүрөгөнү мага дем-күч берип жатты. Күнүгө түрдүү белектерди алып жатам. Баарынан күйөрман кызымдын «Супер-Инфого» чыккан биринчи сүрөттөрүмдөн тартып азыркыга чейинки сүрөттөрүм чапталган эки чоӊ дептерди белек кылганы жагымдуу болду.
Ар дайым Жаратканга шүгүр кылып, көз тийбесин деп тилейм. Анткени канчалык өскөн сайын ошончолук көрө албаган, буттан чалайын деген адамдар, ошол эле учурда сени колдогон досторуӊ да көбөйөт экен. Эл көзүндө жүрүп белгилүү боло баштагандан тарта бир кишиге башкача сүйлөп койсоӊ, «бул жылдыз оорусу менен ооруй баштаптыр» деген жаман сөздөр ээрчийт. Ал сөзгө ка­былбаш үчүн өзүмдү көзөмөлдөп турам. Жакындарыма дайыма «эгер өзгөрүп баратсам айтып койгула» дейм. Акыркы учурда интервью бергенден да кача баштадым. Жаӊылбас жаак, мүдүрүлбөс туяк болбойт да. Туура эмес сүйлөп алуудан коркуп калдым .
– Бир кездеги Атабековдун атактуулугу азыр Нурланга ооп баратат деген ойго кошуласыӊбы?
– Ар бир адамдын доору болот деген чын. Мактангандай болбоюн, акыркы кезде бул сөздү көп укчу болдум. Өткөндө Мирбек байке экөөбүз (ред. Мирбек Атабеков) жолукканда, анын «акты ак, караны кара деш керек. Азыр сенин популярдуу болуп жаткан учуруӊ» дегенине ыраазы болдум. Ал: «Азыр кыргыз эстрадасы үч мотивде кетип баратат. Сенин өзүӊдүн, Мирбек Атабековдун өзүнүн, Гүлжигит Сатыбековдун өзүнүн аудиториясы бар»,- деди. Чындыгында, ар бирибиз өзүбүздүн ырдоо стилибизди бербейбиз (күлүп). Ошолорду айтып күлдүк. Мирбек Атабековдун чыгармачылыгын баалайм. Ал менден 5 жыл мурун ырдап чыккан. Мирбек байке эл оозуна алына баштаганда мен сахнага кадам таштай элек болчумун, анын концерттерине барчумун. Билишимче, ал дагы «Жылдын супер ырчы мырзасы» наамын 3 жолу алган, ээ?
– Ооба, «Заманыбыздын супер ырчы мырзасы» наамы да ыйгарылган...
– Буюрса, анын артынан келип, мен дагы бул наамды 3 жолу алдым.
– Балким, сенден кийин чыгып атактуу болгон ырчы жигитти да «азыркы замандын Нурлан Насиби» деп калабыз. Бул сыймык болсо керек, туурабы?
– Албетте, сыймык. Жаратып жаткан ийгилигиӊ өзүӊө билинбейт тура. Азыр да жакшы ырчылар чыгып жатат. Мен да өз доорумда иштеп алайын.
– Жеке жашоо тууралуу кеп баштасак. Ырчы Асел Кадырбекова менен кыз-жигит болуп сүйлөшкөнүӊөрдү билебиз. Бирок муну жашырып койчусуӊар. Кийин силердин мамилеӊерге чекит коюлганы тууралуу маек бериптирсиӊ...
– Ооба, Асел экөөбүз мурда кыз-жигит болчубуз. Башында эле мамилебизди ачыкка чыгарууну каалаган эмеспиз. Экөөбүз «гезит-журналдарга мамилебизди жарыялабайбыз» деп сүйлөшүп алганбыз. Жылдызыбыз келишпей, кол үзүшүп, дос бойдон калдык. Учурда жүрөгүм бош. Аселди сыйлайм, анын бактылуу болушун каалайм.
– Нурлан Насип үчүн эӊ негизги байлык эмне?
– Мен үчүн башкы байлык – ден соолук. Быйыл бат-баттан ооруп, ооруканага көп көрүндүм. Байкасам, эс алуусуз тынбай иштептирмин. Дарыгер «нервиӊ чарчаган» деди. Тыным жок эле концерт, гастроль, анан той сезону башталып иштеп жүрө бериптирмин. Азыр ден соолугумду жакшылап караганга аракет кылып калдым.
– «Үйлөнсөм, чыгармачылыгым калып калчудай туюлат. Байкасам, бүлө кургандар өчүп калат экен» дегениӊ бар. Бул ойдон кайттыӊбы?
– Бойдок адамдын оюна ар түр­дүү ойлор келет. Бирде туруп үйлөнгүӊ келет, бирде туруп ой жүгүртсөӊ, чыгармачылы­гыӊ калып калчудай сезилет. Бирок антип жүрө берсеӊ туура эмес экен. Анткени чыгармачылыктын да, үй-бүлөнүн да өз орду бар. Буга чейин 25 жашка чыксам үйлөнөм деп пландаган элем. Быйыл үйлөнөйүн десем, ылайыктуу кызды жолуктурган жокмун. Ойлонуп көрсөм, дагы 2 жылдай бойдок жүрө турсам болчудай. Анткен менен убакытты созгум келбейт. Түшүнүктүү кыз табылса, ага эртеӊ деле баш кош­конго даярмын. Жараткан кимге бактымды кайсы күнү буюрса, убак-сааты келгенде жүрөгүмө төп келген кыз табылса үйлөнүүгө даярмын.
– Рахмат, тилегиӊ орундалсын!

Динара Абдыкадырова
star@super.kg