«Бир тууганчик», «Сүйүктүүмдүн каарманы», «Напарниктер» тасмаларында баш каармандын образын жараткан тамашоучу Жеңиш Майрамбек уулу 1-октябрда сүйүктүүсүнө баш кошту. Борбор калаадагы тойканалардын биринде орун алган үйлөнүү үлпөттөгү кызыктарга назар салыңыз.

– Жеңиш, Нурайым, куш бооңор бек болсун! Канча жыл сүйлөшүп баш кошуп жатасыңар?
Жеңиш: – Нурайым экөөбүздүн сүйлөшкөнүбүзгө 7 жылдай болуп калды. Биз Юридикалык академияда окуп жүргөндө таанышып, жарым жылдан кийин кыз-жигит болуп сүйлөшө баштаганбыз.

– Бири-бириңердин кандай сапаттарыңарга арбалдыңар?
Нурайым: – Жеңиш эң биринчиден абдан жөнөкөй жигит. Популярдуу болсо да адамгерчиликтүү, кайрымдуу, адилеттүү мүнөзүнөн жазган жок.
Ж.: – Адам баласы биринчи эле келбетине көңүл бурат эмеспи. Мен дагы Нурайымдын ажарын жана жөнөкөйлүгүн баалагам. Бир сөз менен айтканда, жөнөкөйлүгү менен жүрөгүмдү брондоду десем болот. Анан да экөөбүздүн арыктыгыбыз, тамакты аз жегенибиз, көп уктаганыбыз окшош.

– 7 жыл аз убакыт эмес, ушул аралыкта кандай сыноолорду басып өттүңөр?
Н.: – Бул жылдар аралыгында түшүнбөстүктөн улам чыккан уруштар, эстен кеткис таттуу көз ирмемдер болду.

– Жеңиштин чыгармачылыгын колдойсуңбу?
– Мурда каршы болчумун. Мага көңүл бурбай, 2-3 жумалап чет өлкөгө кеткенде түшүнбөстүктөр болуп турар эле. Азыр ийгиликке жетүү үчүн колдоо керектигин түшүндүм. Андыктан ар тараптан колдоп турмакчымын.

– Рахмат, бактылуу болгула!

Динара Абдыкадырова
Адилет Бектуров
star@super.kg