Бул ырчы жигит түнт мүнөзгө ээ, дайыма токтоо жүргөн адам. Кеп «Асыл тумарым», «Вера в любовь» аттуу ырлардын аткаруучусу Абир Касенов жөнүндө болууда. Анда убакытка так, айтканынан кайтпаган Абир менен болгон маектешүүнүн жыйынтыгына өзүӊүз баа бериӊиз, окурман.

АБИР ЖӨНҮНДӨ

Туулган жылы, күнү – 1985-жыл, 20-июль
Туулган жери – Сокулук району, Шалта айылы
Билими – Кыргыз-Орус Славян университетинин экономика факультети
Бою – 183 сантиметр
Үй-бүлөлүк абалы – Үй-бүлөлүү, 1 уулдун атасы

– Абир, саламатсызбы? Мен айткан убакыттан кечикпей келдиӊиз, чыгармачыл адамдар такай кечигип жүрүшчү эле...
– Ооба (күлүп), убакытка, жумушума так болгонду жакшы көрөм. Бул нерсе менин балалыгымдан калыптанып калса керек. Себеби атам бүт нерсеге так болууну үйрөткөн. Окуучулук кезде түнкү клубдан саат 12де үйгө келем десем, дал ошол убакытта үйдө болуп калуум керек эле. Жаштайымдан ошондой тартипке көнгөм.
– Жакында жарык көргөн «Shake» аттуу ырыӊызга түрдүү сындар айтылды, балким, бул ырды талкуу жаратуу үчүн чыгаргандырсыз...
– Угармандар «качан шаӊдуу ыр жаратасыз?» деп суранып жүрүштү. Ошондуктан бул угармандарым үчүн жаралган ыр эле. Бир күнү интернеттен атактуу модель Ирина Шейк менен актёр Брэдли Купер жөнүндөгү жаӊылыкка көзүм урунду. Анан эргүү келип, клубдарда жаӊырса жарашчудай деп аталган ырды жарыкка алып келдим. Бул менин чыгармачылыгымдын ар тараптуулугунан кабар берет.
– Ошол эле учурда ырларыӊыздын көбү лирикалык, бул сиздин ашыкча романтигиӊизден улам эмеспи?
– Болушу мүмкүн. Бирок менин ырларымдын обону алгач гитарада жаралат. Башында мен жазган обон сүйүү же башка темада болорун билбейм. Себеби музыкага сөз кийин жазылат. Жыйынтыгында сүйүү тууралуу ырлар жаралып калып жатат окшойт.
– Гитара деп калдыӊыз, бул музыкалык аспап менен кантип достошуп калдыӊыз эле?
– 7-8-класста бир жигиттин гитара чертип Виктор Цойдун ырын ырдап жатканын көрүп калдым. Ушунчалык таасирленген экенмин, дароо гитара сатып алдым. Алгач бир байке жөн эле бир-эки чертип, кантип ойношту көрсөтүп берди. Анан өзүм эле үйрөнүп кеттим. Гитараны жонума асып алып шаар аралап жүрө берер элем. Кээ бирөөлөр жолдон «кел, чертип берейин» десе кошулуп ырдап, кыскасы, өткөөл курагымды гитара менен жүрүп өткөрдүм.
– Абир Касенов деген ысым сахнада көптөн бери бар, бирок ал мега жылдыз болуп кеткен жок, ошол эле учурда аны эч ким тааныбайт десек да туура эмес...
– Чындыгында, менин «Асыл тумарым» деген ырым жарык көргөндө ырчылык эмне экенин билчү эмесмин. Башында концерт же кечелерге чакырып ырдап кет дешсе такыр барчу эмесмин. Себеби кантип ырдашты, сахнада өзүмдү алып жүрүштү билчү эмесмин. Ошондуктан уят болом деп коркчумун. Бара-бара сахнада иштегенди үйрөндүм, сапаттуу чыгармаларды жазганды, угармандардын табитине ылайык ыр чыгарганды үйрөнүп калдым. Демек, менде өсүү бар.
– Муну менен баары алдыда дегени турасызбы?
– Балким...
– Ырчылардын ар биринин өз максаты бар, бири чет элге таанылсам десе, бири сынактарда жеӊсем дейт. Сиздин чыгармачылыктагы максатыӊыз эмне?
– Ырларымды жөн жерден жазбайм, алардын да максаты бар. Бирок чет элге таанылуу, ал жакта чыгармачылыгымды өркүндөтүү тууралуу кеп козгой турган болсок, мекенимде эле өркүндөп-өскүм келет. Чет жерлерге тартылбайм, кыргыз калкымдын арасында эле жүрөйүнчү. Кыргызстанда өзүмдү эркин сезем, эргүү да башкача келет. Чет элде мага мынчалык эркиндик жана эргүү тартуулоочу нерселер жок.
– «Жубайымды көрсөтсөм көз тиет деп корком» деп маек бергениӊиз эсимде. Өмүрлүк жарыӊызды эл алдына алып чыгууга мезгил келе элекпи?
– Акырындап чыгармачылык эмне экенин түшүнүп келе жаткандай эле бир күнү жеке жашоом тууралуу кеп козгогон мезгил келет. Азырынча мен дагы, жубайым дагы бул нерсеге даяр эмеспиз.
– Үйдө кандай атасыз, жолдошсуз, ошол тууралуу да айта кетпейсизби?
– Үйдө мекенимдин катардагы миллиондогон мырзаларындай эле. Анан да жубайыма бардык жактан жардам бергим келет. Учурдан пайдаланып мырзаларга айтып кетер элем, жубайыӊардан колуӊардан келген жардамыӊарды аябагыла. Идиш жууп, тамак жасап, өмүрлүк жарыӊардын көӊүлүн алып койсоӊор эч нерседен кемип калбайсыӊар. Менде дал ушундай принцип.
– Ашкана жаатындачы?
– Керек болсо өзүм деле тамак жасап коё берем. Муну жейм, аны жебейм деген жаман жоруктарым жок. Жубайым эмнени даярдаса, ошону жей берем.
– Байкашымча, гастролго чыгып, той-топурларга барып киреше таппайсыз. Демек, үй-бүлөнү багуу үчүн башка жумуш менен алектенесиз?
– Ооба, бирок жумушум тууралуу кеп козгоону каалабай турам.
– Түшүнүктүү, сизге чыгармачылык ийгилик!
– Рахмат.

Маек соӊунда

– Мүнөзүӊүз оор туюлду же адашып жатамынбы?
– Мындай сынды буга чейин уккан эмес элем. Балким, толкундануудан улам ушундай сезилгендирмин.
– Өзүӊүзгө кайсы ырыӊыз жагат?
– Бардык жан шериктерге арналганы үчүн «Две половинки» деген ырым жагат.
– Жубайыӊыз тууралуу суроолорго такыр жооп бергиӊиз келбеди...
– Мен бул адамды канча жыл издедим, аны бирөө сын көз караш менен карашына азырынча жол бере албайм.
– Сизди таӊ калтырчу нерсе барбы?
– Өмүрүмдө Абир аттуу мырзаны жолуктура элекмин. Эгер азыр ысымы Абир деген бирөө менен тааныштырчу болсоӊ, аябай таӊ калмакмын.
– Сүрөткө түшүп жатып такыр жылмая албай койдуӊуз...
– Ооба, мага кайсы бир эмоцияны чагылдыруу өтө оор. Жылмаюу баарынан оор.

Нуркыз Курманбек кызы
Адилет Бектуров
star@super.kg