«Балам, балалуу болгондо билесиӊ» деп апаларыбыз айтып калат эмеспи. Эне болуу – бул бир гана наристе жытына мас болуп, толкунданып сулуу сүрөттөрдү социалдык тармактарга жүктөө эмес. Анын артында уйкусуз түндөр, түгөнбөс түйшүк жатат. Биз көбүнчө эл көзүндөгү айымдарды төрөсө деле сынын бузбай, сахнада ырдап жүргөндөрүнө гана күбө болот эмеспизби. Бул жолу ырчы айымдардан эне болгондон кийин жашоосу кандай өзгөрдү, сурап көрөлү.

Гүлзада Рыскулова, ырчы: «БАЛАМА ОЮМДАН ЧЫГАРЫП, КАНДАЙ ГАНА ЫРЛАРДЫ ЫРДАБАЙМ»
-Чынын айтсам, мага бала багуунун түйшүгү билинбей деле жатат. Жардамчы сиӊдилерим бар, баламды ошолор карашат. Үйдө жумуш деле жасабайм, көбүнчө жумуштан бошобойм. Азыр Ош шаарындабыз. Чоӊ атасы менен чоӊ энеси борборго бара алышкан эмес. Андыктан небересин көрсөтөлү деп келген элек. Кудай жалгап, уулум Курманбек жоош, курсагы тойсо болгону. Азыр бир жарым айлык болду. Баарынан кызыгы – улуу балам кызганбайт деп ойлогон элем. Бирок кичүүбүздү эркелетип койсок, «Мени да ушинтип жакшы көрчүсүзбү, эркелетчү белеӊиз?» деп кызганып сурап калат. Анан «ооба, сени да ушинткем. Сен да кичинекей болгонсуӊ» деп анын да көӊүлүн алганга аракет кылып жүрөм. Жолдошум экөөбүз теӊ баласаак экенбиз. Деги койчу ырдап да беребиз, сүйлөшүп да отурабыз наристебиз менен. Түнү тынч уктаганы менен, күндүзү тынбай сүйлөшүп турушубуз керек. Жадакалса Манас да угат, оюмдан чыгарып кандай гана ырларды ырдап жатканымды уксаӊыздар, күлөт болушуӊар керек. Өзгөчө эмизип жатканда жакшы тилектеримди айтам, себеби эненин сүтү аркылуу жакшы каалоо-тилектер балага өтөт экен. Негизгиси кыргызымдын керегине жараган адам болсо экен деп жатабыз.

Айгерим Расул кызы, ырчы: «АТАСЫ ҮЙДӨ БОЛСО, ЭЧ КИМГЕ БЕРБЕЙ ӨЗҮ КАРАЙТ»
-Кош бойлуу кезимде 30 килограммга жакын салмак кошкон элем. Кызым дагы чоӊ төрөлдү. Бирок төрөттөн бир жума өтпөй дароо 15 килограммга арыктадым, убакыттын өтүшү менен баягы кошкон салмагымдан дайын да калбады. Баланы эмизгенде тамак ылгап жеп калат экенсиӊ, ошого да арыктап жатат окшойм. Төрөттөн кийин наристемдин кыркы чыкканча төркүнүмдө болдум. Концерт, тойдун баарын жыйыштырып кызымды гана карап отурдум. Кырк күн өткөн соӊ дароо тойлорго чакыруулар келе баштады. Анын үстүнө шайлоого карата үгүт иштери да башталып калган болчу, дароо эле жумушка киришип кеттим. Кайсыл жакка барбайын кызым Ханбийке дайыма жанымда. Кокустан үйгө таштап кетчү болсом 1-2 сааттан ашпай жетип келем. Чогуу алып алсам, эмизип, жардамчыларыма карматып кетем. Ырдап бүтүп келгиче томпоюп уктап турат. Үйдө болгонубузда күндүзү, түндөсү да чыр салып кыйнабайт, жаткызып койсом уктай берет. Ойгонсо деле өзү менен өзү болуп ыйлабайт. Ушунусуна миӊ мертебе шүгүр. Кээде сүткө тойбой калганда буламык да берип жатам. Кыскасы, энелик милдетимди жакшы эле өтөп жаткандаймын. Атасы болсо жумуштан колу бошосо эле жетип келет. Жолдошум үйдө болгондо эч кимге бербей өзү карайт. Ошондуктан көп кыйналган жокмун.

Айпери Кубик кызы, ырчы: «ТҮНДӨСҮ БАЛА КАРАП, КҮНДҮЗҮ «ЗОМБИДЕЙ» БОЛУП ЖҮРӨМ»
-Төрөткө чейин 15 килограммга толгон болчумун. Азыр бала эмизип отуруп 50 килограмм болуп калдым. Уулум Даян чындыгында «капризный». Мен жумуш жасап жатканда үйдөгүлөр дайыма колго көтөрүп жаман көндүрүп коюшту. Ошого колдон түшпөйт. Кыркы чыкканча төркүнүмдө болуп эч кандай кыйынчылыкты деле сезген эмес элем. Үйгө келген соӊ баламдын уйкусу алмашып түндөсү уктабай, ойгонуп алат. Күндүзү жыргап уктайт, жолдошум экөөбүз «зомбидей» болуп жүрөбүз. Төрөгөн соӊ бир айдан кийин концерттерге чыга баштадым. Алгач мындай учурларда өзүмдүн апам каралашып жатты. Азыр болсо жолдошум жумуштан эрте келсе ал карайт, же кайненем жумуштан келсе ал. Иши кылып ким жумуштан эрте келсе ошол адам карап турат. Кээде үйдөгүлөр күлүп калышат «бала багуу оӊой дедиӊер беле» дешип. Баары бир балаӊдын кылыктары, наристе жыты болгон кыйынчылыкты унуттурат экен. Балам менен алышып отуруп үй жыйнаганга жетишпейм, же тамак жасай албайм. Ошентип эле убакыт өткөрөбүз. Анан да жумуш деп тытынып жүргөндүктөн үйдө отуруп калганда бир аз башкача сезимдер болду. Наристеӊдин жанында болгон албетте, жакшы, бирок баары бир жумушуӊду сагынат экенсиӊ.

Нуркыз Курманбек кызы
star@super.kg