Ырчылардын жашоосунда күн менен түн алмашып калган. Алар күндүз уктап, кечинде той, концерттерге чыгышат эмеспи. Бүгүн Сайкал түнү менен студияда ыр жаздырып, «биротоло силерге маек берип анан уктайын» деп саат 9:00дө кеӊсебизге баш баккан эле. Ырчы менин суроолорума чарчаӊкы маанайда жооп берип жатты.

– Сайкал, уйкудан калып күнү-түнү катуу иштеп жаткансыӊ го?
– Ооба, студиядан «Апакем» деген ырды жаздырып келе жатам. Күндүз бошобой, биз бошосок студия бошобой, айтор, кээде ушинтип түнү менен иштегенге туура келип калат. Азыр үйгө барып бир аз уктап анан келейин десем, мен уктагандан кийин бульдозер менен ойготсо да турбайм. Ошондуктан жумуштарды бүтүрүп уктагандан ырахат алам. Негизи эле такыр бош убакыт жок. Клип тарттырмай, ыр жаздырмай, тойго чакыруулар... Ушинтип жүрүп былтыркыга салыштырмалуу 8 килограммга арыктап кетиптирмин.
– Канчалык иштеп жатсаӊар да азыр «Кыз-Бурактан» мурункудай Касиет Артыкова, Айжамал Кабылова сыяктуу көз токтотуп, эсте кала турган
кыздарды көрбөй жатабыз...
– Айжамал эже «Кыз-Буракка» 5-классында келген. 10 жылдан соӊ популярдуу болуп аты чыккан. Менин ырдап баштаганыма 13 жыл болду. Азыркы кыздар деле иштесе болот. Тилекке каршы, жаӊы аты чыгып тааныла баштаганда турмушка чыгып кетип жатышпайбы. Мурда келишимде 25 жашка чейин турмушка чыгууга тыюу салынган эле. Азыр чектебей, эркиндик берип койгонбуз. Бирок бул нерсе болбойт экен. Ошондуктан апам «келишимге өзгөртүүлөрдү киргизем» деп жатат.
– Эл арасында «Кыз-Буракты» тойго чакырсак, Сайкал Ошто болсо, Оштогу кыздары менен эле барып фонограмма менен ырдап кете берет, кыздардын үнү өздөрүнүкү эмес» деген нааразычылыктар болуп жатат...
– Биз Бишкектебиз, Ошко тойго чакырып 5 кыздын жол киресин төлөп беришсе, бул жактан кыздарымды алып барам. Бирок акысы 1500 доллар болуп кетет. Ошто деле «Кыз-Бурак-2» деген топ бар, алар даярдоо группасында. Аларды да окутуп сахнага даярдап жатам. Өзүм топтун негизги курамындагы кыздар менен жүрөм.
– «Кыз-Бурак» тобу толугу менен сенин колуӊа өттү беле?
– Эмки жылы топтун 40 жылдыгы болот, ошондон кийин толугу менен мага өткөрүп берет. Апам сырттан эле көзөмөлдөп турат, топтун түйшүгү менин моюнумда. Ишенесизби, апам күнүгө эртеӊ менен саат 8де тургузат. Кечинде саат 12де топтун иштери, убактымды каякка жумшадым, ошол боюнча бир күндүк отчёт берип анан уктайм. Ошондо да «эшикти бекиттиӊби, газды текшердиӊби, жарыкты өчүрдүӊбү?» деп тактап туруп анан «эми уктай бер» дейт. Байкуш апам эки жолу үй күйүп кетип коркуп калган да.
Бир жолу кыздар кышында Бишкектеги үйдөгү үйлөмө ток мешти күйгүзүп коюп кетип калышкан экен. Кыздардын бөлмөсү өрттөнүп баштаганда апам келип өрт өчүргүчтөрдү чакырып өчүрткөн. Ошондо ачуусу келген ал кыздардын баарын тизип аябай урушкан эле. Бул окуя Оштогу үйдө да кайталанган. Ал жактагы эмеректер, кыздардын формалары өрттөнүп кеткен. Андан кийин апам жаӊы үй салып, жаӊы эмеректер менен кыздардын бөлмөсүн сонун кылып койду.
– Апаӊ эмки жылы 63 жашка чыгат экен...
– Апам мен эс тартканда кандай болсо, азыр деле ошол бойдон. Чачы да, кашы да, мүнөзү да эч өзгөргөн жок. Мага караганда тыӊ, бүт жакка жетишет. Мен да келечекте апамдай иш билги кыйын аял болгум келет. Ал үчүн талыкпас эмгек кылып тажрыйба топтоом зарыл. Андыктан апамдан кимге кантип сүйлөш керек, убакытты кантип туура пайдаланыш керектигин үйрөнүүдөмүн. Былтыр январдан бери жанталашып клип тарттырып, ыр жаздырып жакшы эле иштедим. Буюрса жаӊы жылдык программаларга тартылып алган соӊ январда ооруканага жатып бир сыйра дарыланып, эс алып чыксамбы деп жатам.
– Мурунку жигитиӊ Нурлан клип, тасмага тартылып эл оозуна актёр катары алына баштады. Ал сенин атактуулугуӊдан пайдаланып шоу чөйрөгө баш багып алган сыяктуу...
– Менин атактуулугумду пайдаланды же пайдаланган жок деп айта албайм. Эл баарын көрүп турат. Андыктан ал жигит жөнүндө эч нерсе айткым келбейт. Бойго жеткенден кийин арзуусун билдирген мырзалар четтен чыгат экен. Алардын бирөөсүнө карап койсоӊ күлдү, күлүп койсоӊ жүрдү кылып жиберип жатышпайбы.
– Бирок учурда «Добулбас» тобундагы Ильяз менен сүйлөшүп жатканыӊ чындык да. Ал менин досум деп актанарыӊды билем. Кесиптештериӊ Асел менен Нурлан да доспуз деп мамилелерин жашырып келишкен эле...
– Ооба, Нурлан да, Асел да менин досторум. Мен экөөнүн ортосундамын, экөөнө теӊ тартпайм. Менин оюмча, эки жаш үйлөнгүчөктү элге жарыялабай эле турганы оӊ. Анткени ар кандай күтүлбөгөн окуялар болуп кетип, экөө баш кошпой калышы мүмкүн. Мен актанбайм. Чындыгында, Ильяз менин жигитим экендиги тууралуу кептер калп. Азырынча жигити жок эле тынч жашап турууну чечтим.
– Байкашымча, жигиттерден көӊүлүӊ калгандай, балким, ушак сөздөн тажагандырсыӊ...
– Андай сөздөрдү мен көтөрө берем, бирок апама катуу тиет экен. Азыр 23 жаштамын. Буюрса, баарына жетишем. Албетте, апам небере жытын жыттап чоӊ эне, таене болгонго татыктуу. Ал үчүн тарбиялуу, тектүү, мени жана апамды сыйлаган, чыгармачылыгымды түшүнгөн жигитке турмушка чыгышым керек.
– «Учурда кризис болуп жатат» деп эмнегедир элдин маанайы суз, бул нерсе сага байкалуудабы?
– Эмне, кризис болуп жатабы? Бизге азырынча жете элек окшойт. Финансы жагын апам карайт, акчаны да апам карайт. Мага эмес, ага сезилип жаткандыр.
– Маегиӊе рахмат!

Замира Рахманбердиева
star@super.kg