24-ноябрда Түркиянын аба күчтөрү Орусиянын бомбалоочу аскердик Су-24 учагын абадан атып түшүргөн соӊ 2 өлкөнүн алакасы кескин начарлап, ансыз деле бычак мизинде турган дүйнөлүк саясий абалды курчутту. Түркия жана анын Батыштагы союздаштары Орусия өлкөнүн аба чектерин бузду, эскертүүлөргө көӊүл бөлбөдү десе, Орусия учак Сириянын аймагында болгонун, Түркиянын чегинен бир чакырым аралыкта учуп жүргөн кезинде атып түшүрүлгөнүн айтууда.

ТҮРКИЯГА КАРШЫ САНКЦИЯЛАР
Орусия окуяга реакцияны көп күттүргөн жок. Түркия менен Орусиянын ортосундагы визасыз режим 1-январдан тарта жоюлмакчы болду. Бул тууралуу Орусиянын тышкы иштер министри Сергей Лавров билдирди. Ошондой эле Түркиядан келүүчү айыл чарба продукцияларына 1-январдан баштап чектөө киргизилип, Орусиядагы туроператорлорго аталган өлкөгө эс алуу турларын сатууга тыюу салынып, 2015-жылдын 1-декабрынан тарта чартердик авиаучуулар токтотулду.
Түркияга каршы санкциялар муну менен эле чектелген жок. Орусияда иш алып барып жаткан түркиялык компаниялардын ишмердүүлүгү да токтотулмакчы болду. Түркия мындай экономикалык санкциялардан чоӊ зыян тартары айдан ачык. Мисалы, 2014-жылы эле Орусиядан 3,3 миллион турист Түркияга эс алууга барган.

АТАМБАЕВ ЭКИ ОТТУН ОРТОСУНДА
Орусиялык жалпыга маалымдоо каражаттары ЖККУга мүчө өлкөлөрдү, анын ичинде Кыргызстанды «аскердик-саясий өнөктөшүн колдобой жатышат» деп күнөөлөп чыгышты.
«Орусиянын аскердик учагын атып түшүрөрү менен Түркия НАТОго мүчө өлкөлөргө кайрылып, альянс тезинен жыйынга чогулду. Анкара «Орусия Түркиянын аба мейкиндигин бузду» деген айыптоосу боюнча союздаштарынын толук колдоосуна ээ болду. Ал эми ЖККУ боюнча Москванын союздаштары өз позицияларын конфликттен 2 күн өткүчө да билдиришпеди» деп жазды
Лента.ру агенттиги.
«Кыргызстандын президенти Алмазбек Атамбаев кыйын абалда калды. Бир жагынан ал орусиячыл саясатчы катары белгилүү. Быйыл Кыргызстан ЕАЭСке мүчө болуп кирди. Экинчи жагынан Атамбаев түрк лидери Режеп Тайип Эрдоган менен жакшы мамиледе. Атүгүл президенттик шайлоодо Эрдоган утуп чыкканда анын жеӊишинин урматына уюштурулган митингде сөз сүйлөгөн. Орусиянын союздаштарынын чечкинсиздигин түшүнсө болот. Анткени Түркия ЖККУга мүчө өлкөлөр менен экономикалык бекем катыштары бар ири держава. Анын артында АКШ менен өнөктөштөрүнүн күчтүү колдоосу турат. Бирок баары бир
ЖККУга мүчө өлкөлөргө ким кас, ким дос экенин так аныктап алууга туура келет» деп улантат Лента.ру.
«ЖККУга мүчө бардык өлкөлөр учактын атып түшүрүлүшүнөн улам келип чыккан Орусиянын Түркияга каршы аракеттерин түшүнөт» деп билдирди ЖККУнун башкы катчысы Николай Бордюжа.

Эльвира Караева
politika@super.kg