47 жаштагы Өзгөн районунун тургуну өзүнүн баласын атып өлтүрүп алды. 3 небересин атасыз калтырган шектүү бул кылмышка мас абалында барганын айтат.

«БИЗГЕ ӨЛҮККАНАДАН КАБАРЛАШТЫ»
2015-жылдын 30-ноябрында Ош облусуна караштуу Өзгөн РИИБинин нөөмөт бөлүмүнө райондук өлүкканадан чалышып, киши колдуу болуп өлгөн адамдын сөөгү жөнүндө билдиришкен. Бул кылмыш ишти тергеп жаткан Өзгөн РИИБинин тергөөчүсү Кыялбек Ныязбеков төмөнкүлөрдү айтып берди:
– Кылмышка шектүү Өзгөн районунун Заргер айыл өкмөтүнө караштуу Жаӊы-Айыл айылында 1968-жылы туулган Акматкул Кочкорбаев ошол күнү мас абалында үйүнө барып, 1987-жылы туулган уулу Жоодарбек Кочкорбаев менен чатакташа кеткен. Мас болуп келген атасына ачууланган уулу «апабыз Орусияга кетпей үйдө болгондо сен ичпей, чогуу жашамакпыз» деген нааразычылыктарын айткан. Акматкул Кочкорбаев баласына «Сен апаӊа жардам берип, ал Орусияга кетти. Апаӊдын жоктугуна нааразы болуп жатсаӊ, анда жаӊы апа алып келип берейин» дейт. Бул сөзгө териккен баласы атасына кол көтөрүп, натыйжада экөөнүн ортосунда уруш чыгып кетет.
Атасы менен урушуп кеткен соӊ уулу келинчегине «балдардын кийим-кечесин салыштырып даярдан, үйдөн кетебиз» деген. Алар кийим салынган баштыктарын Ауди үлгүсүндөгү унаасына салып кетерде атасы аларга тоскоол болот. Жоодарбек кичүү баласын келинчегине карматып жөө кетирип жиберет да, өзү 3 жана 4 жаштагы кызы менен уулун унаага салып, кетүүгө камынат. Бул учурда Акматкул Кочкорбаев үйүнөн 28 калибрлүү мылтыгын алып чыгып, рулдагы уулун 2 ирет атып жиберген. Натыйжада унаанын айнеги сынып, анын чачырандылары арткы орундуктагы балдардын беттерин тилип кеткен. Ал эми уулу башынан алган жаракатынан улам ошол жерде каза тапкан.

«ШЕКТҮҮ УУЛУН КОРКУТУП КОЁЮН ДЕГЕМ ДЕЙТ»
– Аймактык тескөөчүлөр барып кылмышка шектүүнү мас абалда жүргөн жеринен колго түшүрүштү. Окуя катталган үйдүн сарайынан чөптүн арасына катылган мылтык октору менен табылды. Кылмышка шектүү өз көрсөтмөсүндө 28 калибрлүү ок атуучу мылтык ага атасынан калганын айтты.
Мылтык мыйзамдуу түрдө каттоодон өтпөптүр. Ал «баламды өлтүрөйүн деген оюм жок болчу. Аны коркутуп коюу максатында эле мылтык кезегем. Ок унаанын терезесин сындырып өтө албайт деп ойлогом. Бирок мен жакын туруп аткандыктан терезени талкалап кетти окшойт» деп жатат. Кылмышка шектелип кармалган Акматкул Кочкорбаев учурда Ош ОИИББинин убактылуу кармоочу жайына киргизилген. Анын үстүнөн Кылмыш жана жаза кодексинин 97-беренеси (адам өлтүрүү) боюнча кылмыш иши козголгон.

МАРКУМ ОКУЯ БОЛГОН ЖЕРДЕН КАЗА ТАПКАН
Бетине айнектин сыныктары чачыраган балдарга медициналык жардам көрсөтүлгөн. Ал эми маркум Жоодарбек Кочкорбаевдин сол жаагынан кирген ок жаактын ортосуна чейин тешип кеткен. Сол кулагынан кирген ок болсо, каракуштун сол тарабынан тешип чыккан. Анын баш сөөгүнөн жалпы 20га жакын бытыра табылган.
Ичкиликтин айынан бир күндө бир үй-бүлө 2 мүчөсүнөн айрылып отурат. Алардын бири абакта болсо, бири минтип дүйнө салды. Маркумдун артында 3 баласы жана жубайы калды. Ал эми кылмышка шектүүнүн каза тапкан уулунан башка дагы 3 баласы бар.