Кыргызстандын атын куудулдук өнөрү менен чет өлкөлөргө таанытып келе жаткан «Азия Микс» командасы КВНдин Жогорку Лигасынын келерки сезонуна каражаттын жоктугунан катышпай калышы мүмкүн. Аталган команданын директору Камила Абдилдин айтымында, алар буга чейинки оюндарга чет өлкөдөгү адамдардын колдоосу менен катышып келишкен.
«Командага Кыргызстандан кээде эле жардам көрсөтүлөт. Бирок балдар ар бир демөөрчүнүн иш-чараларына катышып же жарнамаларына тартылып жүрүшөт. Былтыркы Москва мэринин кубогунда команда капитаны Эльдияр Кененсаров демөөрчү таба албай, оюнга катышууга кеткен 10 миӊ доллар анын моюнунда калган. Андыктан олчойгон карыздан жана демөөрчүнүн жоктугунан жаӊы сезонго катышпай калуу маселеси жаралууда. Кийинки сезонго катышабызбы же жокпу жакында белгилүү болот»,- дейт команданын директору.
Эске салсак, аталган команда Орусиянын Светлогорск шаарында өткөн «Голосящий КиВин-2015» музыкалык фестивалында жеӊүүчү болгон. Ага удаа эле КВНдин Жогорку Лигасынын жарым финалына чейин жетишкен.