20-январда Жогорку Кеӊеш 2012-жылдын 20-сентябрында кол коюлган Камбар-Ата-1 ГЭСин жана Жогорку Нарын каскадын куруу жөнүндөгү кыргыз-орус тараптарынын ортосундагы келишимди денонсациялоо боюнча мыйзамды 3 окууда теӊ жактырды. Тышкы иштер министринин орун басары Эмил Кайкиев парламенттик комитетте аталган маселе боюнча сүйлөп жатып: «Бул жерде эч кандай саясат жок, бир гана экономика. Орусиялыктар ГЭСтерди куруу долбоорлорунан баш тартышкан жок, алар жаӊы шарттарды сунушташты. Бул шарттар кыргыз тараптын кызыкчылыктарына жооп бербейт»,- деген болчу.
Бирок Кыргызстан келишимден бир жактуу чыгуу менен Орусия тарапка 37 миллион доллар кайтарып берет. Маалыматтарга караганда, дал ушундай сумманы Орусия тарап Жогорку Нарын каскадынын курулуш иштерине жумшаган. 37 миллион доллар кайда, кандайча жумшалганын текшерүү боюнча «Ата Мекен» фракциясы демилге көтөрүп, 21-январда Жогорку Кеӊеште 12 депутаттан турган комиссия түзүлдү.