Олимпиада оюндары жана дүйнөлүк, континенттик чемпиондуктар спорттогу эӊ ири мелдештер болуп эсептелинет. Бирок ар түрдүү спортто тарыхы бай, кирешелүү жана дүйнө жүзү боюнча популярдуулугу менен айырмаланган абройлуу мелдештер жок эмес. Бул оюндар жүздөгөн өлкөнүн спортчуларын бириктирип, көрүүчүлөргө эстен кеткис таасир калтырат.

Футбол
«УЕФА ЧЕМПИОНДОР ЛИГАСЫ»
Дүйнө жүзүндөгү спорттогу эӊ популярдуу Дүйнөлүк чемпиондук көрүүчүлөр боюнча Олимпиаданы ашып түшкөнү белгилүү. Ал эми клубдар арасында «Чемпиондор Лигасы» аталыштагы жыл сайын өтчү континенттик мелдеш эӊ абройлуу болуп эсептелинет.
Келип чыгышы – 1955-жылы француз журналисти Габриэль Ано тарабынан негизделген.
Өткөрүлчү жери – Европа континенти.
1991-жылдан тарта «Чемпиондор Лигасы» атала баштаган. Жеӊүүчү команда 15 миллион евро менен сыйланат.

Теннис
«УИМБЛДОН» «ЧОӉ ШЛЕМДЕРДИН» АТАКТУУСУ
Теннисте «Чоӊ шлем» аталган 4 ири мелдеш дүйнөнүн 4 тарабында өткөрүлөт. Австралия жана АКШдагы Ачык Биринчиликтер, Франциядагы «Ролан Гаррос» жана Англияда өтчү «Уимблдон». Булардын арасынан Лондондо өткөн мелдеш өзгөчөлөнөт.
Келип чыгышы – 1877-жылы теннисти патенттеген англиялык Уолтер Уингфилд уюштура баштаган.
Өткөрүлчү жери – Англия, Уимблдон шаары
Салттары – «Уимблдон» корттору чөп менен төшөлгөн, андыктан теннисчилер бул мелдешке ак түстөгү кийим менен чыгышы зарыл. Оюн учурунда спортчу айымдарды
«мисс» же «миссис» деп, ал эми эркектерди фамилиясынан гана чакыруу керек.
Сыйлык фонду – 37 миллион еврону чапчып, жеӊүүчүлөргө 2 миллионго жакын евро ыйгарылат.

Америкалык футбол
МАЙРАМГА АЙЛАНГАН «СУПЕР БОУЛ»
Америкалыктардын телевизиондук рекорддорду жыл сайын жаӊылап турган мелдеши – бул «Супер Боул». Тактап айтсак, америка футболунун финалдык беттеши ушундай аталат.
Келип чыгышы – 1966-жылы америкалык футбол конфедерациясы жана Улуттук Лиганын биригишинен улам келип чыккан.
Өткөрүлчү жери – АКШ
Аталган беттеш өлкөдөгү эӊ белгилүү телевизиондук иш-чара. Анда жарнама үчүн көпчүлүк компаниялар миллиондоп акчасын чачышат. Ал эми эл үчүн «Супер Боул» өтчү күн улуттук майрам катары кабыл алынат.

Киберспорт
«THE INTERNATIONAL»
Технологиялардын өнүгүшү менен түптөлгөн киберспорт жылдан жылга популярдуулугун арттырууда. Киберспорт – компьютер оюндарындагы мелдеш. Анда жыл сайын «Dota 2» оюнунун алкагында өтчү «The International» мелдеши эӊ беделдүү деп саналат.
Келип чыгышы – 1997-жылы алгачкы «Doom 2» тармактык оюнунун чыгышы менен дүйнөгө тараган.
Жалпы байге фонду – 20 миллион АКШ долларын чапчыса, жеӊүүчү команда 6 миллион доллардан ашык каражат утат.

Гольф
САЛТТАРГА БАЙ «МАСТЕРС»
Чыныгы ак сөөктөрдүн оюнунун беделдүү мелдеши катары «Мастерс» аталып келет. Бул оюндарга катышуу эмес, көрүүчү катары кирүү да оӊой эмес.
Келип чыгышы – 1939-жылы америкалык ак сөөктөр Боб Жонс менен Клиффорд Робертс тарабынан негизделген.
Өткөрүлчү жери – АКШ, Жоржия штаты
Салттары – Чемпиондор үчүн жашыл пиджак кийгизилип, ар жылдары чемпион аталган спортчулар үчүн «түшкү тамактануу» уюштурулуп келет. Көрүүчүлөрдүн көпчүлүгү муундан-муунга өтчү абонемент аркылуу киришет.

Эрежесиз уруш
ЖАРНАМА АРКЫЛУУ ИЙГИЛИККЕ ЖЕТКЕН UFC
Байыркы Римдеги Колизейдеги гладиаторлордун беттештеринен айырмасы анчалык деле эмес. Сегиз бурчтук. Эки мушкер. Эч кандай эреже жок. Ооба, бул биздин заманда эле өткөрүлүп келген UFC алкагындагы беттештер. Мында дүйнөнүн ар бурчунан чогулган мушкерлердин беттештери учурда абдан популярдуу.
Келип чыгышы – 1993-жы­лы америкалык Арт Дэйви түптөп, алгач телевизиондук шоу катары гана чыга баштаган.
Өткөрүлчү жери – АКШ
Дүйнө жүзүнүн атактуу мушкерлерин өз карамагына чогултуп, мыкты жарнама менен коомчулукка бат эле тараган. Учурда бул уюмдун беттештери телевизиондук трансляциясы миллиондоп сатылып, көрүүчүлөрдүн купулуна толчу беттештерди тартуулайт.

Адилет Керимбек уулу
sport@super.kg