21-февраль күнү быйыл «Евровидение» сынагында Украинанын намысын Ошто төрөлгөн Жамала (Сусана Жамалидинова) коргой тургандыгы белгилүү болду. Сынактын тандоо турунда калыстар тобу Жамалага 2-орунду ыйгарышканы менен, көрүүчүлөрдүн берген добушунун саны аны 1-орунга алып чыкты. Ырчы сынакта аткара турган ырын былтыр жаздырган. Аталган ыр 1944-жылы депортацияланган крымдык татарлар тууралуу.
Белгилей кетсек, Жамала 1983-жылы 27-августта Ошто төрөлүп, балалыгы Крымда өткөн. Ата-теги крымдык татарлар. Ата-энеси музыкант болгондуктан Жамала кичинекейинен эле музыкага жакын өсүп, Украинада, Орусияда жана башка өлкөлөрдө өткөн музыкалык сынактарга катышып келген. Мындан сырткары 2009-жылы Юрмалада жаштар арасында өткөн «Жаӊы толкун» сынагынын жеӊүүчүсү болгон. Ошондой эле ырчы 2011-жылы да «Евровидениенин» тандоо турунда 3-орунга чыгып, бирок суперфиналдан баш тарткан.
Эске салсак, былтыр бул сынакка Украина өлкөдөгү саясий абалдан улам катыша алган эмес.